प्रकृती अधिकारी, काठमाडौँ, चैत १७ गते । जिल्ला शिक्षा कार्यालय काठमाडौँले अनुमति नै नलिई विदेशी बोर्डका शैक्षिक कार्यक्रम सञ्चालन गर्दै आएका विद्यालयहरुलाई नयाँ शैक्षिक सत्रमा विद्यार्थी भर्ना नलिन भनेको छ ।
जिशिकाले त्यस्ता विद्यालयलाई लिखित रुपमा नै निर्देशन दिँदै भर्ना नलिन र लिएको पाइएमा कारवाही गर्ने चेतावनी दिएको छ ।
काठमाडौँका जिल्ला शिक्षा अधिकारी बैकुण्ठ अर्यालले विदेशी शिक्षण संस्था तथा बोर्डसँग सम्बन्धन लिई सञ्चालन भइरहेका त्यस्ता विद्यालयहरुले शिक्षा मन्त्रालयबाट पनि अनुमति तथा स्वीकृति लिनुपर्ने अनिवार्य व्यवस्था भएको बताउँदै भन्नुभयो, “उनीहरुले मन्त्रालयबाट अनुमति लिएका छैनन् । त्यसैले उनीहरुले आगामी २०७० सालको शैक्षिक सत्रका लागि नयाँ विद्यार्थी भर्ना पाउने छैनन् ।”
जिशिअ अर्यालले भन्नुभयो, “जे गरे पनि हुन्छ भन्ने प्रवृत्तिको अन्त्य गर्न चाहेका छौँ । आफूखुशी ठाँउ सारी गरेका र अनुमति बेगर सञ्चालित ती विद्यालयहरुले २०७० सालको शैक्षिक सत्रका लागि नयाँ विद्यार्थी भर्ना लिन पाउने छैनन् । लिइएको पाइएमा बन्द गरिदिन्छौँ ।”