१० असार ।
शिक्षकले धेरै राजनीति गरेका कारण एसएलसी परीक्षामा निकै कमजोर नतिजा आएको आरोप लागे पनि शिक्षकहरूले भने राजनीति गर्न नछाड्ने बताएका छन् । शिक्षकहरूले राजनीति पनि ट्रेड युनियन अधिकारभित्रै पर्ने दाबी गर्दै एसएलसी सुधारका नाममा प्रतिबन्ध लगाउन नपाइने बताएका हुन् ।
आइतबार शिक्षा पत्रकार सञ्जाल इजोनले गरेको कार्यक्रममा नेपाल राष्ट्रिय शिक्षक संगठनका अध्यक्ष बाबुराम थापाले शिक्षकहरूमा राजनीतिक अधिकार रहेको बताए । उनले भने, ‘ट्रेड युनियनको राजनीतिक अधिकारमा कर्मचारीतन्त्रले बाधा पुर्याउन खोजे मुद्दा हाल्न पनि सकिन्छ ।’ उनले शिक्षाको सुधारका लागि मिलेर जानसकिने बताए ।
नेकपा–माओवादीनिकट अखिल नेपाल शिक्षक संगठनका अध्यक्ष गुणराज लोहनीले पार्टीको झन्डा बोकेर नहिँडेको र शिक्षाको सुधारकै लागि लागिरहेको बताए । एमाओवादीनिकट अखिल नेपाल शिक्षक संगठनका अध्यक्ष रत्नबहादुर वलीले पुरानो शिक्षा प्रणालीले नतिजा खस्केको दाबी गर्दै शिक्षकलाई दोष दिएर राजनीतिमा लाग्नबाट वञ्चित गर्न नहुने बताए ।
शिक्षक युनियनका अध्यक्ष दिलबहादुर जोशीले मन्त्रालयको आचारसंहिता पालना गर्न तयार रहेको तर शिक्षकलाई राजनीतिमा बन्देज लगाउन नहुने बताए ।
यस वर्षको एसएलसी परीक्षामा निकै कमजोर नतिजा आएपछि शिक्षा मन्त्रालयले सुधार गर्न मातहतका निकायलाई २३बुँदे निर्देशन दिएको छ । निर्देशनपछि मनलाग्दी गर्ने र राजनीति पार्टीको झन्डा बोकेर हिँड्ने शिक्षकहरू जिल्ला शिक्षा कार्यालयको स्वीकृतिविना कुनै पनि कार्यक्रममा जान पाउने छैनन् ।