रौतहट, भदौ १३ - छात्रालाई यौन दुर्व्यवहार गरेको आरोपमा रौतहटको गौर ८ मा रहेको एक निजी विद्यालयका शिक्षक पक्राउ परेका छन ।
गौर ८ मा रहेको इन्टरनेशनल बाल एकेडेमीका शिक्षक कामेश्वर साह पक्राउ परेका हुन ।
साहले कक्षा ५ मा अध्यनरत छात्राहरुलाई पटक पटक यौन दुर्व्यवहार गरेको भन्दै अभिभावकहरुले साहलाई समातेर प्रहरीको जिम्म लगाएका हुन् ।
शिक्षक साहले आफ्नै विद्यालयमा अध्यनरत ११–१२ वर्षका बालिकाहरुलाई गलत नियतका साथ समाउने, शरीरका विभिन्न अङहरु चलाउने तथा चुम्बन गर्ने गरेको बालिकाहरुले आफ्ना अभिभावकलाई जानकारी गराएका थिए ।
आफ्ना छोरीहरुमाथि यौन दुर्व्यवहार हुने गरेको थाहा पाएपछि आक्रोशित अभिभावकको समूह विद्यालयमा पुगेका थियो । अभिभावकहरु आएपछि विद्यालयका प्रधानाध्यापकले आरोपी शिक्षक साहलाई विद्यालयबाट निकाल्दै प्रहरीलाई खबर गरेका थिए ।
“विद्यालयमा भएको घटनाले स्तब्ध छु”, प्रधानाध्यापक सन्तोष पौडेलले भन्नुभयो “दोषीलाई हदैसम्मको कारवाहीको लागी सहयोग गर्ने छु ।”