तुलसीपुर (दाङ), फागुन ११ गते । जिल्लाका सामुदायिक विद्यालयको भवन निर्माणसँगै मर्मत र अन्य भौतिक पूर्वाधारको निर्माणमा जिल्ला शिक्षा कार्यालयले यस वर्ष विशेष योजना अगाडि सारेको छ ।
विद्यालय क्षेत्र सुधारअन्तर्गत यस वर्ष विद्यालयको भौतिक सुधारका लागि रु आठ करोड ४७ लाख खर्च गर्न लागेको जिल्ला शिक्षा अधिकारी जीतबहादुर शाहले बताउनुभयो ।
जिल्लाका सामुदायिक विद्यालयका भवन निर्माण, कक्षाकोठा मर्मत तथा फर्निचर व्यवस्थापन, विद्यालयको बाह्य वातावरण संरक्षण, छात्रा शौचालय निर्माणमा जोड दिइएको छ ।
शिक्षा कार्यालयका अनुसार यो वर्षमा ४१ सामुदायिक विद्यालयमा दुईकोठे भवन निर्माण गरिने भएको छ । भवन निर्माणका लागि प्रत्येक विद्यालयमा रु सात लाख ५० हजारले रु तीन करोड ४५ लाख रकम विनियोजन गरेको छ ।
त्यसैगरी यो चालु वर्षमा जिल्लाका ४१ सामुदायिक विद्यालयमा कक्षा पुनःस्थापना मर्मत तथा फर्निचर व्यवस्थापनका लागि रु ८२ लाख बजेट दिएको छ ।
कक्षा कोठा पुनःस्थापना तथा फर्निचर व्यवस्थापनका लागि प्रतिविद्यालय रु दुई लाखको दरले रकम बाँडेको शिक्षा कार्यालयले जनाएको छ ।
विद्यालयको बाह्य वातावरण संरक्षणका लागि ४१ विद्यालयलाई पर्खाल लगाउने, तारबार, खानेपानी ट्याङ्की निर्माणका लागि प्रत्येक विद्यालयमा रु दुई लाख ५० हजार रकम प्राप्त गरेका छन् । त्यसैगरी विद्यालय क्षेत्र सुधारअन्तर्गत विभिन्न मावि र उच्च माविलाई यस वर्ष जिल्लाका १२ विद्यालयले रु २४ लाखका दरले रु एक करोड २० लाख रकम पाएका छन् ।
यस चालु वर्षमा जिल्लाका १५ विद्यालयले भवन मर्मतका लागि रु ७५ लाख रकम प्राप्त गरेका छन् । त्यो रकमबाट विद्यालयले भवनको मर्मत तथा २७ विद्यालयमा छात्रा शौचालय बनाउन रु ६७ लाख ५० हजार रकमको व्यवस्था गरिएको छ ।
जिल्लाका पाँच वटा विद्यालयलाई भूकम्प सुरक्षाका लागि भनेर रु २५ लाख विनियोजन गरिएको छ । रासस तस्बिर उपलब्ध छ)