काठमाडौँ, १० मंसिर । काठमाडौँमा विवाह गरेकी दाङकी एक महिला शिक्षकले निकै प्रयत्न गर्दा पनि उपत्यकाभित्र सरुवा गर्न सकिनन् । ‘सोर्सफोर्स’का लागि उनी राजनीति दलका कार्यकर्तादेखि शिक्षा मन्त्रालयका उच्च पदाधिकारीसम्म पुगिन् । कहीकतैबाट सरुवा हुन नसक्ने भएपछि उनी आफैले सेवा निबृत्त हुन केही समय बाँकी रहेका शिक्षकहरु धुइँधुइँति खोज्न थालिन् ।
उनको यो प्रयास सफल बन्यो । काठमाडौँ उपत्यकाभित्रका केही शिक्षकले पारस्परिक सरुवा हुन चाहे । ती महिला शिक्षकको खुशीको सीमा नै रहेन । तर उपत्यकाभित्रका ती शिक्षकहरुको माग सुने पछि उनी निकै निराश भइन् ।
“चार जना शिक्षकहरु फेला पारे । उनीहरु मसँग ‘म्युचुअल’ सरुवा हुन तयार भए” ती महिला शिक्षकले आफ्नो नाम उद्धृत नगरिदिन आग्रह गर्दै भनिन्, “तर उनीहरुले त्यसका लागि रकम माग गरे ।”
उनका अनुसार सबैभन्दा कम एक शिक्षकले तीन लाख रुपियाँ माग गरे । अन्यले चारदेखि पाँच लाख रुपियाँसम्म माग गरे ।
अवकास हुन छ महिनादेखि डेढ वर्ष बाँकी रहेका त्यस्ता शिक्षकहरुले सेवाबाट बिदा लिँदा थप केही रकम प्राप्त होस् भनेर यसरी माग गर्ने गरेका छन् ।
यस्तो प्रवृत्ति काठमाडौँमा मात्र होइन, देशका सबै जिल्लामा देखिएको छ । सेवा निवृत्त हुने समय घर्किन लागेका शिक्षकहरु यसैगरी आम्दानी गरी पारस्परिक सरुवाका लागि तयार हुने गरेका छन् ।
उनीहरु जाँदा जाँदै कमाउ हुने भन्दै अन्य जिल्लामा गई एक, डेढ वर्ष विताउन तयार हुने गरेका छन् । यस्ता सरुवा देशभरि भइरहे पनि शिक्षा निकायका पदाधिकारीहरुलाई अत्तोपत्तो नै चल्ने गरेको छैन । उनीहरुले दुवै विद्यालयबाट सहमति ल्याउने गरेका छन् ।
शिक्षा मन्त्रालयका प्रवक्ता (सहसचिव) डा. हरि लम्सालले यस्तो प्रवृत्ति देखिएको बताउँदै भन्नुभयो, “यस्ता सरुवा रोक्न देशभरिका जिल्ला शिक्षा कार्यालयहरुलाई निर्देशन दिइसकेको छ । सेवा अवकास हुने समय आइसकेका शिक्षकहरुको ‘म्युचुअल’ सरुवा नगर्नू भनेका छौँ । सम्भवतः अब यस्ता सरुवा हुँदैन ।”