१३ चैत, काठमाडौं । एसएलसी सकिएको र अरु कक्षाको वाषिर्क परीक्षा पनि सकिन लागेपछि विद्यालयमा कार्यरत अस्थायी र करार शिक्षकहरु आफ्नै जाँचको तयारीमा जुटेका छन् । आउँदो जेठ दोस्रो हप्ता हुने स्थायी शिक्षकको परीक्षाका लागि झण्डै ५ लाखले आवेदन दिएका छन् । आवेदन दिएका कार्यरत र नयाँ शिक्षकहरु अहिले तयारीमा व्यस्त भएका छन् ।
स्थायी शिक्षकको दरबन्दी सबै जिल्लामा गरी ४ लाख ७९ हजार ८ सय ५३ रहेको शिक्षक सेवा आयोगले जनाएको छ । आयोगले प्राथमिक, निम्न माध्यमिक र माध्यमिक तहमा गरी १३ हजार ५९ शिक्षकलाई स्थायी गर्ने गरी दरखास्त आहृवान गरेको छ । माध्यमिक तहमा २ हजार २ सय ८६ पदका लागि ६१ हजार ३४ को आवेदन परेको छ । यस्तै निम्न माध्यमिक तहमा २ हजार ७ सय ९३ पदको लागि १ लाख ६६ हजार ५ सय ५८ ले आवेदन दिएका छन् । प्राथमिक तहको ७ हजार ९ सय ८० पदको लागि २ लाख ५२ हजार २ सय ६१ को आवेदन परेको छ ।
सबैभन्दा बढी काठमाडौंमा २७ हजार ८ सय ९१ जनाको आवेदन परेको छ । काठमाडौंमा माविका लागि ३ हजार ९ सय ३७, निमाविका लागि ९ हजार ४ सय ९३ र प्राविका लागि १४ हजार ४ सय ६१ ले दरखास्त दिएको आयोगले जनाएको छ । आयोगले १७ वर्षपछि खुला गरेको स्थायी शिक्षकका लागि आउँदो जेठ ९, १० र ११ गते लिखित परीक्षा लिँदैछ ।
परीक्षाका लागि आयोगले सबै विषयको नमूना प्रश्नपत्र पनि सार्वजनिक गरेको छ । आयोगको वेवसाइटमा नमूना प्रश्नपत्र र पाठ्यक्रम हेर्न सकिने शिक्षक सेवा आयोगका अध्यक्ष उदयराज सोतीले जानकारी दिनुभयो ।
परीक्षाका लागि आयोगले सबै विषयको नमूना प्रश्नपत्र पनि सार्वजनिक गरेको छ । आयोगको वेवसाइटमा नमूना प्रश्नपत्र र पाठ्यक्रम हेर्न सकिने शिक्षक सेवा आयोगका अध्यक्ष उदयराज सोतीले जानकारी दिनुभयो ।
हाल देशभर झण्डै २५ हजार शिक्षक पद रिक्त रहे पनि आयोगले १३ हजार ५९ शिक्षकलाई स्थायी गर्ने गरी दरखास्त आहृवान गरेको हो । हाल देशभर एक लाख ४७ हजार शिक्षक रहेकोमा ४० हजारको संख्यामा अस्थायी र राहत शिक्षक कार्यरत छन् ।