काठमाडौँ, वैशाख ३ गते । नेपाल कलेज अफ इन्फरमेसन टेक्नोलोजी (एनसिआइटी)मा अध्ययनरत चार विद्यार्थीले आफूहरुले तापक्रम मापन गर्न सक्ने यन्त्रको निर्माण गरेको दाबी गरेका छन् ।
संसारको जुनसुकै कुनामा बसेर अर्को कुनाको तापक्रम नाप्न सकिने यन्त्र आफूहरुले निर्माण गरेको उनीहरुको दाबी छ ।
एनसिआइटीको सातौँ सेमेस्टरमा अध्ययनरत प्रशान्त ढुङ्गाना, गोकर्ण कार्की, सुनिल गोदार र अनिश थापाले सो यन्त्रको निर्माण गरेका हुन् । उनीहरुले सो यन्त्रलाई ‘डिजिटल टेम्प्रेचर डिस्प्ले’ नाम दिएका छन् ।
तीन महिनाको प्रयासमा तयार पारिएको यन्त्र निर्माणमा १० हजार रुपैयाँ खर्च भएको ढुङ्गानाले बताए ।
ढुङ्गानाका अनुसार एक स्थानबाट अर्को स्थानमा सजिलै बोकेर लैजान सकिने डिजिटल प्रविधिको यन्त्रले वातावरणमा भएको तापक्रम तत्काल देखाउने छ ।
यन्त्रमा मानिसको स्पर्श हुनेबित्तिकै स्क्रिनमा शरीरको तापक्रम देखिन्छ । यस्तै, यन्त्रले सेल्सिय, फरेनहाइट, र केल्भिनसहित सबै युनिटमा तापक्रम देखाउने प्रविधिसमेत जडान गरिएको उनले बताए ।
विद्यार्थीहरुले सो यन्त्रको उपयुक्त परीक्षणका लागि सरकारी निकायलाई समेत आग्रह गरेका छन् ।
विद्यार्थी ढुङ्गानाका अनुसार अमेरिकाको लोकेसन तय गरेर मेसिनमा राख्ने बित्तिकै सो यन्त्रले अमेरिकाको समेत तापक्रम मापन गर्न सक्छ ।
आफूहरुले निर्माण गरेको यन्त्रको वैज्ञानिक परीक्षणका लागि विज्ञान, वातावरण तथा प्रविधि मन्त्रालयलाई आग्रह गरिएको पनि ढुङ्गानाले बताए । रासस