गाईघाट(उदयपुर), ३ वैशाख । यस वर्ष २०७० सालको नयाँ शैक्षिकसत्र सुरु भएपनि उदयपुर जिल्लामा विगतका वर्ष जस्तै पाठ्यपुस्तकहरुको अभाव देखिएको छ । सदरमुकाम गाईघाटलगायत जिल्लाका अधिकांश सरकारी तथा निजी विद्यालयहरुले नयाँ शैक्षिक सत्रको विद्यार्थी भर्नाहरु धमाधम लिने कार्य थालिसकेका छन् । विद्यार्थीहरु विद्यालयहरुमा भर्ना हुने क्रम सुरु भएतापनि सम्बन्धित पुस्तक पसलहरु तथा स्टेसनरीहरुले भने एउटा पनि पाठ्यपुस्तक उपलब्ध गराउन सकेका छैनन् ।
गतवर्ष पनि शैक्षिकसत्र सुरु भएको करिब चार महिना पछिमात्र धेरै विद्यार्थीहरुले पाठ्यपुस्तक प्राप्त गरेका थिए । जिल्लाका पहाडी गाविसका सरकारी विद्यालयहरुले समयमा पाठ्यपुस्तक प्राप्त गर्न नसक्दा आधा वर्ष विद्यार्थीले पुस्तक बिहिन अवस्थामा अध्ययन गर्नुपर्ने अधिकांश विद्यालयका शिक्षक तथा अभिभावकहरुको गुनासो रहँदै आएको छ । जिल्ला शिक्षक सङ्घ उदयपुरका अध्यक्ष तीलबहादुर कटुवाल भन्नुहुन्छ, “समयमा पाठ्यपुस्तकहरु उपलब्ध हुन नसक्दा विद्यार्थीहरुको पढाईमा असर पर्न गई धेरै विद्यार्थीहरुले प्रवेशिका परीक्षामा असफल हुने गरेका छन् ।” जिल्लाको पहाडी गाविसका विद्यालयका विद्यार्थीहरुले जहिले पनि शैक्षिकसत्र सुरुभएको तीन÷चार महिना पछिमात्र बल्ल–बल्ल पाठ्यपुस्तक मुस्कीलले प्राप्त गर्ने गरेको अधिकांश पहाडी क्षेत्रका अभिभावक तथा शिक्षकहरु बताउँछन् । जनता उच्चमाबि जाँतेका शिक्षक पुष्पकुमार राई भन्नुहुन्छ “समयमा पुस्तक प्राप्त नहुँदा कक्षा भरीका विद्यार्थीहरुले एउटा पुस्तक भएको विद्यार्थीसँग मिलेर पढ्नुपर्ने अवस्था हुने गरेको कारण पनि पढाईमा असर हुने गरेको देखिन्छ ।” पहाडी क्षेत्रबाट पाठ्यपुस्तक लिनको लागि र्नै पटक–पटक सदरमुकाम गाईघाट बजार झर्दा बल्ल–बल्ल तीन÷चार महिना पछि किस्ताबन्दीको रुपमा पुस्तकहरु प्राप्त हुने गरेको उदयपुर आँपटारका अभिभावक हर्कबहादुर कटुवाल गुनासो गर्नुहुन्छ ।
सरकारी विद्यालयहरुले मात्र हैन, निजी विद्यालयहरुले पनि पाठ्यपुस्तकको अभावमा हैरानी उस्तै खेप्न परेको निजी विद्यालयका शिक्षक तथा अभिभावकहरु बताउँछन् । पिसजोन ईन्टरनेसनल एकेडमी गाईघाटका प्रिन्सिपल वैद्यनाथ साह भन्नुहुन्छ, “चैत्रको अन्तिम साताबाट नै आफूहरुले नयाँ विद्यार्थी भर्ना खोल्ने गरेको छौं, विद्यार्थीहरु भर्ना भएर पढ्न आउन सुरु गरेपनि समयमा पाठ्यपुस्तकहरु उपलब्ध नहुँदा कक्षा सञ्चालन गर्न समस्या हुने गरेको छ ।” यता सदरमुकाम गाईघाटका पुस्तक बिक्रेता तथा स्टेसनरी सञ्चालकहरु भने आफूहरुले समयमा नै पाठ्यपुस्तकहरु काठमाडाँै तथा विराटनगरबाट मगाउने गरेको तर, समयमा पुस्तकहरु आइनपुग्दा समस्या हुने गरेको बताउँछन् ।रासस