काठमाडौं, ३ वैशाख
खुला विश्वविद्यालयको स्थापनालाई उच्च प्राथमिता दिन सरोकारवालाले सरकारसँग माग गरेका छन् । नेपालमा खुला तथा दूरशिक्षाको अवस्था, चुनौती विषयमा शिक्षा पत्रकार समूह र इन्टरनेसनल सेन्टर फर एकेडेमिक्सले मंगलबार काठमाडौंमा आयोजना गरेको अन्तक्र्रियामा सहभागीले सरकारले प्राथमिता नदिएकै कारण खुला विश्वविद्यालय स्थापना हुन नसकेको आरोप लगाए । शिक्षाविद् र अन्य सरोकारवालाले करिब दुई दशकदेखि खुला विश्वविद्यालय स्थापनाको आवाज उठाए पनि अहिलेसम्म खुला विश्वविद्यालयसम्बन्धी कानुन बन्न नसकेको बताए । सरकारले कानुनको मस्यौदा तयार गर्न एक वर्षअघि खुला विश्वविद्यालय पूर्वाधार विकास समिति गठन गरेको थियो ।
शिक्षाविद् प्राडा.मनप्रसाद वाग्लले कानुन निर्माण गरी विश्वविद्यालय स्थापनाका लागि राजनीतिक प्रतिबद्धता र सरकारी प्राथमिकता आवश्यक पर्ने बताए । समय र आर्थिक अभाव एवं अन्य कारणबाट नियमित रूपमा शिक्षण संस्थामा अध्ययन गर्न जान नसक्नेका लागि खुला विश्वविद्यालयबाट अध्ययनको अवसर दिन सकिने जिकिर उनले गरे । शिक्षाविद् प्राडा. वाग्लेले राजनीतिक प्रतिबद्धता र सरकारी प्राथमिकताको अभावका कारण नै समितिले चुस्त गतिमा काम गर्न नसकेको बताए । समितिका सदस्य डा.प्रमोद ढकालले पनि गठन भएको एक वर्ष बितिसक्दासम्म समितिले कुनै देखिने र चर्चायोग्य काम गर्न नसकेको आरोप लगाए ।
गत वर्षको जेठ महिनामा गठन भएको समितिले खुला विश्वविद्यालयसम्बन्धी ऐनको मस्यौदा बनाउनका लागि विभिन्न विधागत समिति गठन गर्नुका साथै व्यवस्थापन, कृषिलगायतका विभिन्न विषयमा अवधारणा बनाउने काम गरिरहेको छ । शिक्षा मन्त्रालयका प्रवक्ता महाश्रम शर्माले खुला विश्वविद्यालयको स्थापना सरकारको प्राथमिकतामा रहेको बताए । प्राथमिकतामा रहेकै कारण सरकारले जतिसक्दो छिटो कानुन तर्जुमा गर्नका लागि खुला विश्वविद्यालय पूर्वाधार विकास समिति गठन गरेको बताए । विदेशी विश्वविद्यालयबाट सम्बन्धन लिएर सञ्चालित शिक्षण संस्थाले गरेका उपलब्धि देखेर पनि सरकारले खुला विश्वविद्यालयको स्थापनालाई महŒव दिएको उनले बताए ।
भारतको इन्दिरा गान्धी नेसनल ओपन युनिभर्सिटीको सम्बन्धनमा १२ वर्षदेखि विभिन्न तह र विषयमा खुला तथा दूर शिक्षाको कार्यक्रम सञ्चालन गरिरहेको काठमाडौंको इन्टरनेसनल सेन्टर फर एकेडेमिक्स (आईसीए)ले यस पटक बेस्ट ओभरसिज पार्टनर इन्स्टिच्युसन अवार्ड २०१३ पाएको छ । इन्दिरा गान्धी नेसनल ओपन युनिभर्सिटीले आफूबाट सम्बन्धन पाएका विश्वका ४३ मुलुकका ८१ ओटा शिक्षण संस्थामध्येबाट आईसीएलाई गत शुक्रबार भारतीय राष्ट्रपति डा.प्रणव मुखर्जीले बेस्ट ओभरसिज पार्टनर इन्स्टिच्युसन अवार्ड २०१३ प्रदान गरेका थिए ।