२ बैशाख, काठमाण्डौं । मुलुककै पुरानोमध्येको एक कारागार नक्खुका कैदी-बन्दीको दैनिकी अहिले फेरिँदै गएको छ । हस्तनिर्मित घरेलु उत्पादनमा अधिकांश समय खर्च गर्दै आएका उनीहरु पछिल्लो समयमा अध्ययनमा बढी जोड दिन थालेका छन् ।
कारागार प्रशासन स्वयंले शिक्षाप्रति सकारात्मक भूमिका निर्वाह गरेपछि विविध कारणले बीचैमा पढाइ छाडेकाहरु त्यसलाई निरन्तरता दिन थालेका छन् । यसले कैदी-बन्दीमा सकारात्मक प्रभाव पारेको कारागार प्रशासनले जनाएको छ ।
कारागार प्रशासनले अहिले ८ कक्षासम्मको पढाई सुरु गरेको छ । त्यसलाई क्रमशः बढाउँदै लैजाने उसको योजना छ । डेढ सय क्षमताको सो कारागारमा अहिले दुईओठा ब्लकमा गरी झन्डै ५ सय कैदी-बन्दी छन् । तीमध्ये १ सय भन्दा बढी पढ्न थालेका छन् । सबैभन्दा बढी विद्यार्थी कक्षा ८ मा छन् । सो कक्षामा ४३ जना अध्ययनरत रहेको कारागार प्रशासनले जनाएको छ । पहिला पढेको आधारमा कैदी-बन्दीलाई भर्ना लिने गरिएको राजधानी दैनिकमा खबर छ ।
२५ देखि ६३ बर्षसम्मका कैदी-बन्दी सो कारागारको विद्यालयमा अध्ययनरत छन् । जसमा २० देखि ३० बर्षकाको बाहुल्य छ । शिक्षक पनि सोही कारागारका कैदी-बन्दी हुन् । सो कारागारमा स्नातकदेखि विद्यावारिधिसम्म गरेका कैदी-बन्दी छन् ।