छपन्न वर्षमा कक्षा एकमा भर्ना

बागलुङ, १७ जेठ । आधाभन्दा बढी जीवन चुलोचौकोमा बिताएकी बागलुङ भीमापोखराकी पुतली शर्मा स्कुल भर्ना भएको खबरले गाउँघरमा गाइँगुइँ चलेको छ । बुढ्यौलीतिरको उमेरमा कुर्ता सुरुवारमा ठाटिएर शर्मा स्कुल जान थालेपछि गाउँलेहरु दङ्ग छन् । छरछिमेक र आफन्तमा शर्माकै चर्चा छ । बुढेसकालमा पनि स्कुल पढ्ने शर्माको रहर भने गाउँकै शिवालय प्राविले मेटाइदिएको हो । भीमापोखरा गाविस–९, सिममा रहेको शिवालय प्राविले ‘आमा कक्षा’ सञ्चालन गरेपछि गाउँका निरक्षर महिला अहिले अक्षर चिन्ने धोको पालेर स्कुल धाउन थालेका छन् ।

शर्मा अहिले कक्षा १ मा भर्ना हुनुभएको छ । सामान्य लेखपढ पनि गर्न नसक्ने शर्मा जस्तै त्यस क्षेत्रका २० जना आमा छात्रा अहिले विद्यालयको कक्षा १ र २ मा भर्ना भएका छन् । विद्यालयले नियमित विषयअन्तर्गत नेपाली, अङ्ग्रेजी, गणित र व्यावहारिक शिक्षातर्फ खेती किसानीसम्बन्धी कक्षा सञ्चालन गरेको छ । विद्यालय र स्थानीय समुदायको पहलमा सुरु भएको आमा कक्षामा भर्ना हुने महिलाको सङ्ख्या पनि बढ्दै जान थालेको छ । ‘यसो आफ्नो नामसम्म लेख्न सक्ने र अक्षर चिन्न पाइएला भनेर स्कुल भर्ना भएकी हुँ’ शर्माले भन्नुभयो, “हामीलाई पढेर चिकित्सक, पाइलट बनौँला भन्ने त छैन, बुढेसकालमै भए पनि अक्षर चिन्न पाइने भो यही खुसीको कुरा छ ।

” जिन्दगी त बित्न थाल्यो त्यही पनि केही हुन्छ कि भन्ने आशा लागेको छ शर्मालाई । महिलाहरुको व्यावहारिक जीवनयापनमा केही सहयोग पुगोस् भनेर विद्यालयले आमा कक्षा सञ्चालन गरेपछि शर्मासँग पनि केही सजिलो हुने विश्वास पलाएको छ । ‘स्कुल जानकै लागि भनेर बिहान पनि एक पाइला अघि उठ्ने गरेका छौँ’ शर्माले भन्नुभयो,— ‘घरका कामधन्दा, चुलोचौको सबै सिध्याएर १० बजे स्कुल जान्छौँ ।’ पहिलेपहिले छोरीहरुलाई पढाउनु हुन्न भन्ने मान्यता रहे पनि हिजोआज भने परिवारले पनि राम्रो सहयोग गरेको महसुस महिलाहरुले गरेका छन् । ‘बेलैमा पढ्ने भन्ने त केही थाहा पनि भएन, लोग्ने मान्छेहरु मात्रै स्कुल जाने गर्थे’ शर्माले भन्नुभयो,— ‘तर अहिले बुढेसकालमा भए पनि स्कुल जानेभन्दा सबैले राम्रै गरेका छन् ।

’ अक्षर चिन्न नसक्दा घरव्यवहारको सानो हिसाब राख्न, सूचना पाटीका अक्षरहरु पढ्न, अस्पतालका बेडहरु थाहा पाउन, गाडी नं थाहा पाउने जस्ता सामान्य कुरामा पनि दुःख र ठक्कर खानुपरेको निरक्षर महिला बताउँछन् । शर्मा जस्तै भीमापोखराका २० महिला अहिले आमा कक्षामा भर्ना भएर पढ्न थालेका छन् । आमा कक्षामा निःशुल्क पठनपाठनको व्यवस्था गरिएको विद्यालयले जनाएको छ । निरक्षर महिलाहरुलाई साक्षर बनाउने उद्देश्यले आमा कक्षा सुरु गरेको विद्यालय व्यवस्थापन समितिका अध्यक्ष रामप्रसाद शर्माले बताउनुभयो । विद्यालयले आमा कक्षा सञ्चालन गरेपछि गाउँका निरक्षर महिलाहरु खुुसी भएका छन् । आमा कक्षामा भर्ना हुने महिलाको सङ्ख्या पनि दिनहुँ बढ्दै गएको छ । रासस