काठमाडौं, १२ असार
शिक्षासचिवको छिटो–छिटो सरुवाले शिक्षा क्षेत्रमा नकारात्मक असर पर्न थालेको छ । अरू क्षेत्रबाट शिक्षामा आएका सचिवलाई सबै कुरा बुझाउन चार/पाँच महिना लाग्ने र बुझ्नेबित्तिकै सरुवा हुँदा दीर्घकालीन नीति तथा योजना प्रभावित भएका छन् । शिक्षासचिव सरुवा भइरहँदा विकासका साझेदार दातृ निकायसमेत असन्तुष्ट र सशंकित हुन
थालेका छन् ।
डेढ वर्षयता चार सचिव शिक्षा मन्त्रालयमा आएका छन् । यो समयमा शिक्षा मन्त्रालयका कर्मचारीको ‘ब्रिफिङ’ सुन्ने र केही समयपछि नै सरुवा हुने गरेको शिक्षाका कर्मचारीको गुनासो छ । शिक्षा मन्त्रालयका सहप्रवक्ता डा. रोजनाथ पाण्डेले धेरै सरुवाले शिक्षामा प्रभाव पारेको बताए । ‘एउटाले सेटिङ गर्छ, अर्को आएर भत्काउँछ,’ सहप्रवक्ता पाण्डेले भने, ‘नयाँ आउनेले शिक्षाको मुद्दा बुझ्नुपर्यो । सबै बुझिसक्दा सरुवा हुन्छ । यसले दीर्घकालीन
असर पार्छ ।’
कर्मचारीका अनुसार शिक्षामा सहयोग गरिरहेका दातृ निकाय पहिले भएका सम्झौता पूरा गर्नबाहेक थप सहयोगमा सकारात्मक
देखिएका छैनन् ।
अवकाश पाउन डेढ महिना बाँकी हुँदा तत्कालीन शिक्षासचिव शंकरप्रसाद पाण्डेलाई सरुवा गरिएपछि मन्त्रालयमा अस्थिरता आएको छ । ५ मंसिर ०६८ मा पाण्डे सरुवा भएपछि किशोर थापा शिक्षासचिव भएका थिए । त्यसपछि सुरेशमान श्रेष्ठ तथा सोमलाल सुवेदीले शिक्षासचिवको जिम्मेवारी पाए पनि उनीहरू चार/पाँच महिनाभन्दा बढी टिक्न पाएनन् । अहिले नारायणगोपाल मलेगोलाई शिक्षासचिवको जिम्मेवारी दिइएको छ ।
डेढ महिनामा अवकाश पाउने सचिव पाण्डेलाई सरुवा गरेर ५ मंसिर ०६८ मा शिक्षा मन्त्रालयमा ल्याइएका किशोर थापा नौ महिनामै ७ भदौ ०६९ मा सरुवा भए । सोही दिन शिक्षा मन्त्रालय आएका सुरेशमान श्रेष्ठ चार महिना काम गरेर २७ पुस ०६९ मा सरुवा भए । श्रेष्ठपछि सोही दिन शिक्षा मन्त्रालय आएका सचिव सोमलाल सुवेदी पाँच महिना काम गरेपछि ७ असार २०७० मा सरुवा भए । ७ असारमा नारायणगोपाल मलेगो शिक्षासचिवमा नियुक्त
भएका छन् ।
‘छिटो–छिटो सरुवाले शिक्षामा समस्या आएको छ,’ मन्त्रालयका एक विशिष्ट श्रेणीका कर्मचारीले भने, ‘शिक्षा मन्त्रालय दातृ निकायदेखि ग्रास–रुटसम्म जोडिएको छ । सचिवमा अस्थिरता हुनेबित्तिकै एउटा ट्रयाक बिग्रिन थाल्छ । रफ्तारमा जान थालेपछि ब्रेक लाग्छ, यसले विकासमा बाधा पुगेको छ ।’ कम्तीमा दुई वर्ष बस्ने सुनिश्चितता भयो भने योजनाबद्ध र उत्साहित रूपमा काम हुने कर्मचारीको भनाइ छ ।
‘दुई/चार दिनको तयारी गरेर सचिवलाई ब्रिफिङ गर्यो, बल्लतल्ल बुझ्ने वेला भएपछि सरुवा हुन्छ फेरि अर्को तयारी गर्नुपर्छ,’ एक कर्मचारीले भने, ‘शिक्षालाई बाहिरबाट हेर्दा हल्का रूपमा लिइएको छ । तर, यो क्षेत्र प्राविधिक र जटिल छ ।’
धेरैजसो सचिव छिटो सरुवा हुनुको कारण शिक्षा मन्त्री र सचिवबीचको सम्बन्धमा दरार आउनु मानिएको छ । केही दिनअघि सरुवा भएका शिक्षा सचिव र मन्त्रीबीच पनि सम्बन्धमा चिसोपन आएको थियो । मन्त्रालय स्रोतका अनुसार शिक्षामन्त्री माधवप्रसाद पौडेलले तत्काल केही जिशिअको सरुवा गर्न खोजेको र सचिव सोमलाल सुवेदीले आर्थिक वर्ष सकिएपछि मात्र सरुवा गर्ने अडान राखेपछि सम्बन्धमा चिसोपन
आएको थियो ।