काठमाडौं, असार १२
उच्च माध्यमिक शिक्षा परिषद्ले काठमाडौंको सुविधानगरस्थित बार्सा उच्च माविलाई २४ घन्टे अल्टिमेटम दिएको छ । एक स्थानमा सम्बन्धन लिएर अर्कै घरको फ्ल्याट भाडामा लिई कक्षा सञ्चालन गरेको तथा मागेको जानकारीसमेत नदिएको भन्दै परिषद्ले मंगलबार २४ घन्टे अल्टिमेटमसहित पुर्जी
थमाएको हो ।
परिषद्का अनुगमन शाखा प्रमुख उपसचिव डम्बर बतासको नेतृत्वमा गएको टोलीले सहप्राचार्य भानु राईलाई २४ घन्टाभित्र सम्पूर्ण कागजात पेस गर्न निर्देशन दिएको हो । बतासका अनुसार उच्च माविका सञ्चालक समितिहरूमा चर्को विवाद देखिएको र दुईतिर बसेर प्रवेश फारम वितरण गरेको पाइएको छ ।
सो उच्च माविलाई परिषद्ले २७ मंसिरमा आफ्नै भवनमा सञ्चालन गर्न निर्देशन दिएको थियो । १२ कक्षामा करिब आठ सय विद्यार्थी रहेको सो उमाविको अवस्था दयनीय बन्दै गएको बताइएको छ । बतासले भने, ‘चित्तबुझ्दो जवाफ नआए ऐन–नियमअनुसार सम्बन्धन खारेजसम्मको
कारबाही हुनसक्छ ।’
गत वर्ष करिब एक करोड रुपैयाँभन्दा बढी विज्ञापनमा खर्च गरेको सो उमाविले यो वर्ष रकम तिर्न नसकेपछि विज्ञापन एजेन्सी संघ (आन) ले विज्ञापन छाप्नसमेत रोक लगाएको छ ।
आचारसंहिता कार्यान्वयन तथा अनुगमन समितिले आचारसंहिताविपरीत प्रचारका लागि राखिएका उमाविका होर्डिङबोर्ड र स्वागतद्वार हटाउने भएको छ । काठमाडौं सम्पर्क कार्यालयले राजधानीका उमाविको अनुगमन नगरेपछि समितिले नै अनुगमन गरी राजधानीका सडक, चोक र अग्ला घरमा राखिएका होडिङबोर्ड हटाउने तयारी गरेको हो । समितिले गएको ९ असारमा रिङरोड र वरपरका सडक र अग्ला घरमा राखिएका होर्डिङबोर्ड र स्वागतद्वारको तस्बिर संकलन गरेको थियो ।
राजधानीको गौशाला, कोटेश्वर, बानेश्वर, बबरमहल जडीबुटी चोक, सातदोबाटो, कलंकी, बाफल, बालाजु, लगनखेल जावलाखेल, चावहिल, महाराजगन्ज, गैरीगाउँलगायत स्थानमा धेरै संख्यामा पोलब्यानर र आधा दर्जन स्वागतद्वार राखिएको फेला परेको छ ।
समितिले छानबिनका क्रममा कलंकीको एडमार्क, बाफलको ग्रिनफिल्ड, सातदोबाटोको प्रिमियर, गैरीगाउँको नासा, बबरमहलको मेगा, गौशालाको गुरुकुल र तक्षशिला, बानेश्वरको के एन्ड के, महाराजगन्जको ओरियन्टलगायत उमाविले होर्डिङबोर्ड तथा गेट राखेको फेला परेको छ । मेगा कलेजका कार्यकारी निर्देशक गोपाल खनालले आफूले बनाएको गेट हटाइसकेको बताए ।