धर्मेन्द्र मामा
बिर्तामोड । विद्यालयमा शैक्षिक गुणस्तर अभिवृद्धि गर्न अभिभावकको महत्वपूर्ण भूमिका र जिम्मेवारी हुने शिक्षा सरोकारवालाले बताएका छन् ।
उनीहरुले विद्यालयमा अभिभावकको सक्रिय उपस्थिति र सहभागिताले मात्र खस्कँदो शैक्षिक अवस्थालाई उकास्न सकिने निष्कर्ष निकालेका छन् । विद्यालय शिक्षाको ३ खम्बा शिक्षक, विद्यार्थी र अभिभावकको सक्रिय भूमिकाबाट जस्तोसुकै समस्या पनि हल गर्न सकिने र विद्यार्थीको शैक्षिक तथा व्यवहारिक शिक्षामा सुधार ल्याउन सकिने सहभागीहरुको निचोड थियो ।
झापाको विर्तामोडमा शिक्षक मासिक पत्रिकाको आयोजनामा सञ्चालित विद्यालय र अभिभावक विषयक अन्तरक्रियामा शिक्षा मन्त्रालय, शिक्षा कार्यालय, प्रधानाध्यापक, व्यवस्थापन समिति तथा शिक्षकहरुले उक्त निचोड निकालेका हुन् । छलफलमा विभिन्न नमूना विद्यालयहरुले अभिभावकहरुको सहभागीतामा विद्यालयमा अभ्यास भइरहेको कार्यक्रम तथा प्रयासहरु बारे जानकारी गराएका थिए ।
सहभागीहरुले धेरैजसो विद्यालयका अभिभावकहरु निष्कृय रहने गरेको र उनीहरुलाई विद्यालयसम्म आउने वातावरण बनाउन नसकिएका गुनासाहरु पोखे । केही विद्यालयहरुले भने अभिभावकलाई जागरुक बनाएर अघि बढ्दा शैक्षिक गुणस्तरमा वृद्धि भएको अनुभव सुनाए ।
झापा लक्ष्मीपुरको हिमाली निमाविका प्रधानाध्यापक केशव ओझा, मोहनमाया मावि चारपानेकी प्रअ विन्दु श्रेष्ठ, हिमालय उमावि दमकका प्रअ विदुर खतिवडा, विराटनगरकी मधु राई लगायतले आफ्ना विद्यालयका अभिभावकसँगको सहकार्यका कारण नमूना विद्यालय बनाउन मद्दत पुगेको बताए ।
कतिपय प्रधानाध्यापक भने अझैपनि सरकारले केही गरेन भन्दै आलोचना गर्न व्यस्त देखिन्थे । शिक्षकहरुको प्रतिनिधीमूलक संस्था नेपाल राष्ट्रिय शिक्षक संगठनका अध्यक्ष बुद्धिमान कार्की, शिक्षक संघकी उपाध्यक्ष चित्रकला ओली, शैक्षिक गणतान्त्रीक मञ्चका अध्यक्ष शिवराज राजभण्डारी, नेपाल शिक्षक यूनियका अध्यक्ष तेजप्रसाद चौलागाई लगायतले सरकारी नीति गलत भएको, शिक्षकहरुमा सक्रियता नभएको, अभिभावकहरुमा चेतनाको कमी भएको, आदि कारणले शैक्षिक क्षेत्र ओरालो लागेको बताए ।
शिक्षा मन्त्रालयका उपसचिव डा. तुलसी थपलियाले विद्यालय र अभिभावक बीचको अन्तरसम्बन्ध बारे जानकारी गराएका थिए । शिक्षक मासिकका सम्पादक राजेन्द्र दाहालले शैक्षिक क्षेत्रलाई आधार मानेर शिक्षामा परिवर्तन ल्याउन अ ाफू र आफ्नो पत्रिका निरन्तर क्रियाशिल रहेको बताए ।
पत्रकार दाहालले सहजिकरण गरेको उक्त अन्तरक्रियामा झापा, मोरङ, सुनसरी र इलामका जिल्ला शिक्षा कार्यालयका प्रतिनिधीहरुको उल्लेख्य सहभागीता थियो । सुनसरीका जिल्ला शिक्षा अधिकारी वीरबहादुर खड्का, झापाका उपसचिव अशोक कालाखेती लगायतले शिक्षाको गुणस्तर खस्कनुमा सबै पक्षको कमजोरी भएको स्वीकार गर्दै कमी कमजोरीहरुलाई सुधार गर्ने प्रतिबद्धता जनाए । शिक्षक मासिकका सल्लाहकारसम्पादक केदार शर्माले अन्तरक्रियाले सफल अभ्यासहरुलाई अरु समक्ष लैजान महत्वपूर्ण योगदान पू¥याएको बताए । शिक्षक मासिकका झापा प्रतिनिधी चेतन अधिकारीको संयोजनमा भएको उक्त कार्यक्रममा डेढसय बढी शिक्षा सरोकारवालाको सहभागीता रहेको थियो ।