पर्वत, १३ भाद्र
यस वर्षको अन्तराष्ट्रिय साक्षरता दिवस तथा राष्ट्रिय शिक्षा दिवस विभिन्न कार्यक्रम गरी मनाइने भएको छ । यस बर्ष ‘बालमैत्री, अनिवार्य शिक्षा, ज्ञान र सिपको सुनिश्चितता’ भन्ने आदर्श वाक्य सहित देशभर यो दिवस मनाईदै छ ।
बिहीबार जिल्ला शिक्षा कार्यालयमा बसेको शिक्षा सम्बद्ध सरोकारवालाहरुको बैठकले दिवसलाई जिल्लामा विभिन्न कार्यक्रमहरु गरी भव्यरुपमा मनाउने निर्णय गरेको हो । उक्त बैठकले शिक्षा दिवसलाई भव्य रुपमा सम्पन्न गर्न विभिन्न समितिहरु समेत गठन गरी जिम्मेवारी बाँडफाँड गरेको छ ।
दिवसको अवसरमा स्रोत केन्द्रबाट छनौट भई आएका प्राथमिक तहका बालबालिकाहरुले तयार पारेका चित्रहरुको चित्रकला प्रतियोगिता, भाद्र २० गते निमाविस्तरीय हिज्जे प्रतियोगिता, भाद्र २१ गते उच्च मावि तहमा अध्ययनरत बिद्यार्थीहरुबीच निबन्ध प्रतियोगिता, सोही दिन मावि स्तरीय वक्तिृत्वकला, २२ गते बिहान जिल्ला शिक्षा कार्यालयका कर्मचारी र प्राचार्यहरुबीच मैत्रीपूर्ण भलिबल खेल संचालन गरिने भएको छ । त्यस्तै गरी २३ गते जिल्ला शिक्षा कार्यालयबाट प्रभातफेरी शुरु गरी कार्यक्रम स्थलमा पुगी औपचारिक कार्यक्रम शुरु हुने जनाइएको छ ।
शिक्षा दिवसकै अवसर पारेर शिक्षा क्षेत्रमा क्रियाशील उत्कृष्ट शिक्षा कर्मीहरुलाई पुरस्कृत तथा सम्मान गरिने प्रचलन रही आएको छ । पछिल्ला बर्षहरुमा राजनीतिक भागवण्डाको आधारमा शिक्षक तथा शिक्षाकर्मीहरुको मूल्यांकन गरिने गुनासो आउने गरेका थिए । यसवर्ष कस्ता व्यक्तिहरु छनोटमा पर्ने हुन्, योग्य र कर्तव्यनिष्ठ व्यक्तिहरुको उचित मूल्यांकन हुन्छ या हुँदैन प्रश्न उब्जिएको छ ।
वि सं २०३१ सालदेखि नेपालले शिक्षा दिवस मनाउन थालेको हो । यस्तै हरेक सेप्टेम्बर ८ मा अन्तराष्ट्रिय रुपमा मनाइने साक्षरता दिवसलाई पनि भदौ २३ मै मनाउन थालिएको छ । नेपालको शिक्षा क्षेत्रमा राज्यले बजेटको ठूलो हिस्सा लगानी गरेपनि सो अनुसारको प्रतिफल प्राप्त भएको छैन । सामुदायिक विद्यालयको शैक्षिक स्तर कमजोर छ । सरकारी विद्यालय र कलेजहरुले प्रदान गर्ने शिक्षा प्रतिस्पर्धी र सीपमूलक हुन सकेको छैन । विद्यालय र विश्वविद्यालयका परिणामहरु रोजगार सृजना गर्ने भन्दा बेरोजगार उत्पादन गर्नेतर्फ उन्मूख छन् । यस्तो अवस्थामा आकर्षक आदर्श वाक्यका साथ मनाउन लागिएको शिक्षा दिवसले कस्तो सन्देश दिने हो हेर्न बाँकि नै छ ।