सहारा न्यूज सम्बाददाता
पर्वत, १२, असोज
राष्ट्रिय, जनमुखी शिक्षा र मर्यादित शिक्षण पेशाका लागि हाम्रो आन्दोलन, कथित दोस्रो संविधान सभाको निर्वाचनको विरुद्धमा तेस्रो जिल्ला सम्मेलन भन्ने नाराका साथ नेकपा–माओवादी निकटको अखिल नेपाल शिक्षक संगठन पर्वतको तेस्रो जिल्ला सम्मेलन जिल्लाको सदरमुकाम कुस्मामा शनिबार सम्पन्न भएको छ ।
सम्मेलनको बन्दसत्रले १९ सदस्यीय जिल्ला समिति निर्बिरोध निर्वाचित गरेको छ । नव निर्वाचित समितिको अध्यक्षमा भूमिराज शर्मा, उपाध्यक्ष ओम प्रसाद पन्त, सचिव देवी प्रसाद अधिकारी, सहसचिव नारायण जिसी र कोषाध्यक्षमा गुमा जिसी चयन भएका छन् । अन्य सदस्यहरुमा सूर्य थापा, पारिश्वर भुसाल, लोकराज कुँवर, ओम शर्मा, कृष्ण कुमारी गुरुङ्ग, मोति थापा, मिन प्रसाद चपाईँ, धनन्जय मल्ल रहेका छन् । त्यस्तै गरी सम्मेलनले संगठनका निवर्तमान उपाध्यक्ष बिष्णु प्रसाद भुसाललाई केन्द्रीय परिषद प्रतिनिधिमा चयन गरेको छ ।
कार्यक्रममा प्रमुख अतिथिको रुपमा बोल्दै संगठनका केन्द्रीय उपाध्यक्ष देवकला अधिकारीले नेपाली शिक्षकहरुका समस्याहरु समाधान गर्ने तर्फ राज्यले उचित ध्यान दिन नसकेको आरोप लगाउनु भयो । उहाँले भन्नुभयो, शिक्षण पेसालाई मर्यादित र सम्मानित पेसाको रुपमा विकास गर्नु पर्नेमा राज्यले शिक्षकहरुबीच नै विभेद खडा गरिदिएर झनै संकटग्रस्त बनाइ दिएको छ । शैक्षिक क्षेत्रमा देखिएका समस्या समाधानका लागि पटक पटक आन्दोलन गरी सहमति गर्दा समेत शिक्षक तथा विद्यालय कर्मचारीहरुका मागको यथोचित सुनुवाइ नहुनुले राज्य शिक्षाकर्मीहरुका मागहरु प्रति गम्भिर छैन भन्ने कुरा पुष्टि भएको छ । उहाँले शैक्षिक क्षेत्रमा देखिएका समस्याहरुको दीर्घकालिन समाधानका लागि सम्पूर्ण शिक्षकहरु सशक्त संघर्षमा जानुको विकल्प नरहेको बताउनु भयो । अधिकारीले स्वाभीमानी र मर्यादित शिक्षण पेशाको निम्ति संघर्षको अग्रभागमा उभिएर सम्पूर्ण उत्पीडित शिक्षकहरुलाई गोलबन्द गर्दै शिक्षक हकहितका नाममा डलरको खेती गर्ने र प्रतिक्रियावादी राज्य सत्ताको चाकरी गर्दै व्यक्तिगत स्वार्थमा लागेका संघसंस्थाहरुको भण्डाफोर गर्दै शिक्षामा भैरहेको बैदेशिक हस्तक्षेप र व्यापारीकरणको विरुद्धमा उत्रन आग्रह समेत गर्नु भयो ।
कार्यक्रमको उद्घाटन सत्रमा अखिल नेपाल शिक्षक संगठनका केन्द्रीय सचिवालय सदस्य रेशमलाल सापकोटा, नेकपा– माओवादीका जिल्ला सेक्रेटरी जय नारायण तिवारी, अनेरास्ववियु क्रान्तिकारीका केन्द्रीय सदस्य मिनराज केसी, क्रान्तिकारी पत्रकार महासंघ पर्वतका अध्यक्ष बैकुण्ठ गिरि लगायतले शुभकामना मन्तव्य राख्नु भएको थियो । भूमिराज शर्माको अध्यक्षतामा सम्पन्न कार्यक्रममा सहभागीहरुलाई स्वागत शिक्षक लोकराज कुँवरले र संचालन विष्णु प्रसाद भुसालले गर्नु भएको थियो ।
source:www.saharanews.com.np