१२ असोज, वर्दिया । विद्यालयकै कारण एक अपांगता भएकी बालिका पढाइबाट वञ्चित बनेकी छन् । बर्दिया जिल्लाको मोतीपुर–९ की १६ वर्षीया बालिका मुन्नी थारू पढाइबाट वञ्चित भएकी हुन् । स्थानीय आदर्श माध्यमिक विद्यालयमा ६ कक्षामा अध्ययनरत मुन्नीलाई विद्यालयका प्रधानाध्यापक जगमोहन झाले हिँड्न नसक्ने भएकाले पढ्न नआऊ भनेपछि बढाइबाट वञ्चित हुनु परेको छ । प्रधानाध्यापकको भनाइ उद्धृत गर्दै मुन्नीले भनिन्, ‘सरले अपांगले पढेर के गर्छ र भन्नुभयो ।
विद्यालयमा सञ्चालन भइरहेको त्रैमासिक परीक्षामा अपांगता भएकी मुन्नीले बेन्चमा बसेर लेख्न अप्ठ्यारो हुने र हात पनि कमजोर भएको कापीमा अड्याएर लेख्न दिन अुनरोध गरेपछि विद्यालयका प्रधानाध्यापक झाले विद्यालय नआउन आदेश दिएको पीडित बालिकाले बताइन् । प्रधानाध्यापकको यस्तो आदेशपछि मुन्नी त्रैमासिक परीक्षबाट वञ्चित बनिन् । विद्यालयले मुन्नीलाई परीक्षामा सपांग विद्यार्थी सहर नियम लगाएपछि मुन्नीको पढाइ टुटेको राजधानी दैनिकमा खबर छ ।
मुन्नी जन्मजातै अपांग हुन् । अपांग भए पनि उनी पढ्न जाने उमेर भएदेखि नै विद्यालय जाने गरेकी थिइन् । तर, ३ कक्षामा पढ्दा कक्षाकोठामा खेल्दै गरेका साथीहरूले ढालेको बेन्चले मुन्नीको दाहिने खुट्टा नै भाँचिएपछि उनी परीक्षा दिन मात्रै विद्यालय जाने गरेकी थिइन् । परीक्षा दिनबाट समेत विद्यालयले वञ्चित गरेपछि मुन्नीको पढ्ने सपना अधुरै रहेको छ । पढ्ने इच्छा देखेर अभिभावकले उनलाई ह्विलचियरमा राखेर विद्यालय लैजाने गरेका थिए ।
बालिका मुन्नीले यस्तो बताए पनि प्रधानाध्यापक जगमोहन झाले भने विद्यालय नआऊ नभनेको बताए । अपांगमैत्री विद्यालय नभएका कारण परीक्षामा मुन्नीलाई केही अप्ठ्यारो भएको उनले स्विकारे । उत्तरपुस्तिका अड्याउन राखेको कापी परीक्षामा खटिएका शिक्षकले खोस्दा मुन्नीले आफैं अबदेखि स्कुल आउँदिन भनेर गएको प्रअ झाले बताए । मुन्नीका अभिभावकले अपांगता भएका विद्यार्थीलाई विद्यालयले पढ्नबाट वञ्चित गरेको आरोप लगाउँदै कारबाहीका लागि जिल्ला शिक्षा कार्यालयमा निवेदन दिएका छन् ।
Source: http://www.onlinekhabar.com/