मुस्ताङ, १३ असोज । हिमाली जिल्ला मुस्ताङको छुसाङ गाविसमा रहेका छ विद्यालयमा १३ शिक्षक र १५ विद्यार्थी रहेको सार्वजनिक भएको छ । जिल्ला शिक्षा कार्यालय मुस्ताङका अनुसार छुसाङ गाविसको ताङवे प्रावि ताङवेमा तीन शिक्षक, चार विद्यार्थी, जननर्मल निमावि छुसाङमा दुई शिक्षक, दुई विद्यार्थी, ज्योती प्रावि तेताङमा दुई शिक्षक, एक विद्यार्थी, दीपज्योति प्रावि चैलेमा दुई शिक्षक, दुई विद्यार्थी अरनिको प्रावि ध्याकरमा दुई शिक्षक, एक विद्यार्थी तथा समर प्रावि समरमा दुई शिक्षक, चार विद्यार्थी रहेको जिल्ला शिक्षा कार्यालयको तथ्याङ्कमा उल्लेख छ ।
विद्यार्थीको पढ्न पाउने अधिकारबाट कसैलाई वञ्चित गर्न नहुने बताउँदै विद्यार्थी सङ्ख्या बढे सम्बन्धित विद्यालयमा शिक्षक पठाउने र छ वटै विद्यालय एकीकरणको प्रक्रियामा लैजान जिल्ला शिक्षा कार्यालय मुस्ताङ सहमत भएको छ । छुसाङमा रहेको जननर्मल निमाविमा स्थानीयले आवासीय विद्यालय बनाउन रकमको जोहो गर्न थालेपछि जिल्ला शिक्षा कार्यालयले मौखिक सहमति दिएको हो ।
निजीस्तरबाट छुसाङको सामुदायिक विद्यालयलाई आवासीय बनाउने र दुई वर्ष अगाडिबाट अङ्ग्रेजी माध्यममा पढाइ सुुरु भएको जननर्मल निमाविमा अङ्ग्रेजी र स्थानीय भाषा शिक्षक स्थानीयको सहयोगमा राखिने भएको छ भने अन्य शिक्षक आवश्यकताअनुसार पठाइने छ । जननर्मल निमावि छुसाङका प्रधानाध्यापक गुरूप्रसाद सापकोटाले भन्नुभयो, “आवासीय विद्यालय सञ्चालनका लागि पुरानो घर छुसाङ भई हाल काठमाडाँै महाराजगन्जमा स्थायी बसोबास गर्दै आएका प्रेम नम्डुल लामाले रु पाँच लाख सहयोग गर्नुभएको र थप रकमको खोजी भइरहेको छ ।” आगामी फागुन १ गतेदेखि आवासीय विद्यालय सञ्चालन गर्दा ४० विद्यार्थी पु¥याउने लक्ष्य रहेको जानकारी उहाँले दिनुभयो ।
आवासीय विद्यालय सुरु गर्न पूर्वाधारका लागि रु १५ लाख र दीर्घकालीन सञ्चालनका लागि करिब रु ३५ लाख गरी करिब रु ५० लाखको जोहो गर्न विद्यालय व्यवस्थापन समिति लागिपरेको विद्यालय व्यवस्थापन समितिका अध्यक्ष कुङक तेञ्जिङ गुरुङले बताउनुभयो । आवासीय विद्यालय सञ्चालनका लागि नौ वटै वडाको लिखित र जिशिकाको मौखिक सहमति रहेको अध्यक्ष कुङकले जानकारी दिनुभयो । मुस्ताङमा आवासीय विद्यालयको अवधारणाले आफूखुसी भएको भन्दै आवासीय विद्यालय स्थापना भएमा विद्यार्थी सङ्ख्यासमेत उल्लेख्य मात्रामा वृद्धि हुने शिक्षक अभिभावक सङ्घका अध्यक्ष चन्द्र गुरुङले बताउनुभयो ।