१३ असोज, जनकपुरधाम । दुई वर्षको प्रयासपछि बनाइएको रोबट जनकपुरमा प्रदर्शन गरिएको छ । जनकपुरस्थित धनुषा साइन्स क्याम्पस कक्षा १२ मा अध्ययनरत कृष्णाकुमार मण्डलले बनाएको रुसी एस फोर के टुएल्भ नामको रोबट प्रदर्शन गरिएको हो ।
धनुषा जिल्ला वासुदेवपट्टी पचहर्वा-५ का अरूण मण्डल र जुरनीदेवी मण्डलको कोखबाट २०५० सालमा जन्मेका मण्डल सानैदेखि मिहिनेती थिए । रोबट बनाउन निकै नै जटिल समस्या भोग्नुपरेको दुःख पनि प्रदर्शनका क्रममा उनले व्यक्त गरे । लक्ष्य लिएको मान्छे जस्तोसुकै कठिन अवस्थामा पनि हार मान्दैन भनेझैँ उनले आफ्नो सपना पूरा गर्न रोबट बनाएको बताए । यसअघि १० कक्षामा पढ्दा नै उनले रुसी एयर पावर बनाएका थिए ।
रोबट बनाउन रु एक लाख खर्च लागेको जनाउँदै मण्डलले सबै खर्च घरपरिवारले नै उपलब्ध गराएको बताए । आफ्नो व्यक्तिगत खर्च जोगाएर रोबट बनाएको उनले बताए । रोबटमा जनकपुरमै उपलब्ध स्रोत साधनको प्रयोग गरेको प्रस्ट गर्दै आर्थिक अभावका कारण आफूले चाहेजस्तो रोबर्ट बनाउन नसकेको उनले जानकारी दिए ।
उक्त रोबटमा चारवटा सिस्टम र बाह्रवटा बटम रहेको छ । कम पावरको रिमोट भएकाले पाँचसय मिटरको दूरीसम्म मात्रै काम गर्ने उनले बताए । रोबटले रिमोट कन्ट्रोल नियन्त्रणमा रही मानिस जस्तै हातलाई अगाडि पछाडि गर्ने, हिँड्ने, वस्तुलाई समातेर उचाल्नेलगायतका चाल देखाउने गरेको छ ।
उनका अनुसार रोबर्टमा स्थानीय सामग्रीहरु जस्तै रजिष्ट्रान्स, आइसी सेन्टर, ट्रान्जिस्टर, ग्रीन मोटर, घरेलु पार्टस्, रिले, इलेक्ट्रोनिक्स र मेकानिक्स पार्टसको प्रयोग गरिएको छ । उनको चाहना भविष्यमा गएर इलेक्ट्रोनिक्स एन्ड कम्युनिकेशन पढेर रोबर्टिक्स बन्ने रहेको छ । रासस