म्याग्दी, ४ कात्तिक । म्याग्दी जिल्लाका अपाङ्गता भएका बालबालिकाको शिक्षाका लागि प्रवासीले रु ३३ लाख सहयोग जुटाएका छन् ।
रोजगारीको सिलसिलामा हङकङमा पुगेका म्याग्देलीले सिङ्गाको धौलागिरि माविमा सञ्चालित बहिरा, पुलाचौरका बालजागृति प्राविमा रहेको बौद्धिक अपाङ्गता र पिप्ले मौवाफाँटको ज्ञानोदय माविद्वारा सञ्चालित दृष्टिविहीन स्रोत कक्षा सञ्चालनका लागि सांस्कृतिक कार्यक्रममार्फत सहयोग सङ्कलन गरेका हुन् ।
म्याग्दी प्रवास नेपाली सङ्घ (मोना) हङकङद्वारा आज बेनीमा आयोजित पत्रकार सम्मेलनमा संस्थाका कोषाध्यक्ष कर्ण पुनले गत भदौमा हङकङमा गरिएको सांस्कृतिक कार्यक्रममार्फत रु ३३ लाख सङ्कलन गरिएको जानकारी दिनुभयो ।
म्याग्दीको मौलिक पञ्चेबाजा, यानीमाया, थालीनाचलगायत गीत र नृत्य प्रस्तुत गरिएको कार्यक्रममा रु ४३ लाख ५५ हजार ३८१ सङ्कलन भएकोमा रु १० लाख ५५ हजार ३८१ खर्च भई बचत भएको रु ३३ लाख अपाङ्गता स्रोत कक्षा सञ्चालन गरेका तीन विद्यालयलाई रु ११ लाखका दरले उपलब्ध गराइने कोषाध्यक्ष पुनले बताउनुभयो ।
अपाङ्गता स्रोत कक्षाका विद्यार्थीको भरणपोषण र शिक्षकको तलब व्यवस्थाका लागि खर्च गर्ने गरी सम्बन्धित विद्यालयका प्रअ, जिल्ला शिक्षा कार्यालयका प्रतिनिधि र मोना म्याग्दीका अध्यक्षको नाममा अक्षयकोष स्थापना गर्न लागिएको मोना हङकङका अध्यक्ष दल शेरपुञ्जाले जानकारी दिनुभयो ।
सांस्कृतिक कार्यक्रममा हङकङमा रहेका म्याग्देलीको सक्रियता र गैरम्याग्देलीको पनि सहयोगका कारण लक्ष्यभन्दा बढी सहयोग सङ्कलन भएको अध्यक्ष शेरपुञ्जाले बताउनुभयो ।
फरक क्षमताका कारण विद्यालय जानबाट वञ्चित भएका बालबालिकालाई शिक्षाको पहुँचमा ल्याउनका लागि सञ्चालन भएका स्रोतकक्षा दिगो स्रोतको अभावमा सङ्कटमा परेको समाचार विभिन्न सञ्चारमाध्यममार्फत जानकारी पाएपछि सहयोग जुटाइएको उहाँको भनाइ छ ।
हङकङमा रहेका म्याग्देलीको सहयोगका लागि स्थापित संस्थाले पछिल्लो पाँच वर्षयता मानवीय सेवाका लागि जिल्लामा रु ४५ लाखभन्दा बढी सहयोग भित्र्याएको जनाएको छ । हङकङमा करिब ८०० को हाराहारीमा म्याग्देली रहेका छन् । अहिले सिङ्गाको धौलागिरि माविमा सञ्चालन भएको बहिरा स्रोत कक्षामा १५, ज्ञानोदय माविमा सञ्चालित दृष्टिविहीन स्रोत कक्षामा ९ र बालजागृति प्राविको बौद्धिक अपाङ्ग स्रोत कक्षामा २० जना बालबालिकाले शिक्षा लिइरहेका छन् ।
पछिल्लो तथ्याङ्कअनुसार जिल्लाभर २०८ अपाङ्गता भएका बालबालिका शिक्षाको पहुँच बाहिर रहेकामा गत वर्ष २०६८÷६९ मा घटेर १६७ मा झरेको थियो भने यो वर्ष मात्र थप नौ जना अपाङ्ग बालबालिका स्रोत कक्षामा भर्ना भएर पढ्न थालेका शिक्षा कार्यालयकी लेखाजोखा संयोजक कल्पना खड्काले बताउनुभयो ।
source: merojilla.com