प्रकृति अधिकारी,
काठमाडौँ, कात्तिक ४ गते । अब देशभरिका सबै सामुदायिक विद्यालयहरुमा अङ्ग्रेजी माध्यम लागू गरिने भएको छ ।
अङ्ग्रेजी भाषाप्रतिको आकर्षण बढ्दै गएपछि सरकारले सामुदायिक विद्यालयहरुमा अङ्ग्रेजी माध्यम लागू गर्ने तत्परता देखाएको हो ।
शिक्षामन्त्री माधवप्रसाद पौडेलले विद्यार्थीहरुले भाषाका कारण बाधा भोग्न नहुने बताउँदै भन्नुभयो, “त्यसैले सम्पूर्ण सामुदायिक विद्यालयहरुमा अङ्ग्रेजी भाषा लागू गर्ने प्रयासमा छौँ । शिक्षा मन्त्रालयबाट यसै महिनाभित्र यससम्बन्धी निर्णय गराउने सोच बनाएका छौँ ।”
विद्यालय तहमा अङ्ग्रेजी माध्यम लागू गरिए पनि अनिवार्य नेपाली विषय हटाइने छैन ।
निजी विद्यालयसँग प्रतिस्पर्धा गर्ने भन्दै हालका केही वर्षयता मुख्य गरी सहरी क्षेत्रका सामुदायिक विद्यालयहरुले अङ्ग्रेजी माध्यमबाट पठनपाठन गर्दै आएका छन् । काठमाडौँ उपत्यकाका बजार क्षेत्रका कतिपय सम्पन्न सामुदायिक विद्यालयहरुले अङ्ग्रेजी र नेपाली दुवै माध्यमबाट पठनपाठन गर्दै आएका पनि छन् ।
अङ्ग्रेजी माध्यमबाट पठनपाठन गरिएका विद्यालयहरुको शैक्षिक गुणस्तर सुधारिएको पनि पाइएको छ ।
शिक्षाविद् प्रा.डा. विद्यानाथ कोइरालाले सबै सामुदायिक विद्यालयमा अङ्ग्रेजी माध्यम लागू गर्ने कुरा असम्भव नै नभएको तर्क गर्दै भन्नुभयो, “सरकारले यसका लागि आँट देखाउन सक्नुपर्दछ । आँट गर्ने तागत सरकारसँग भए पुग्छ ।”
पाठ्यक्रम विकास केन्द्रले गत २०६० सालबाट कक्षा १ मा, २०६१ सालबाट कक्षा २ मा र २०६१ सालबाट कक्षा ३ मा एउटा अङ्ग्रेजी पुस्तक थप गरेको थियो । देशका कति सामुदायिक विद्यालयमा अङ्ग्रेजी माध्यमबाट पठनपाठन हुँदै आएको छ भन्ने यकिन तथ्याङ्क शिक्षा विभागसँग छैन ।
एसएलसी परीक्षामा सबैभन्दा बढी अनिवार्य विज्ञान, अनिवार्य गणित र अनिवार्य अङ्ग्रेजी विषयमा विद्यार्थीहरु अनुत्तीर्ण हुने गरेका छन् । अङ्ग्रेजी माध्यबाट पठनपाठन गर्दै आएका त्रिपद्म उमावि, जुद्ध पब्लिक उमावि लगायतका विद्यालयको एसएलसी परीक्षाको नतिजा प्रायः अब्बल नै रहँदै आएको छ ।
शिक्षामन्त्री पौडेलले अङ्ग्रेजी माध्यमबाट पठनपाठन गराउँदा शिक्षकको समस्या पर्न सक्ने स्वीकार्दै भन्नुभयो, “अङ्ग्रेजी माध्यमबाट अध्यापन गर्न नसक्ने शिक्षकलाई तालिम दिनेछौँ ।”
शिक्षाविद् प्रा.डा. मनप्रसाद वाग्लेले उपत्यकाभित्रका सबै सामुदायिक विद्यालयमा अङ्ग्रेजी माध्यमबाट पठनपाठन गराउन सम्भावना हुनसक्ने बताउँदै थप्नुभयो, “सामुदायिक विद्यालयका शिक्षकहरु सबैभन्दा बढी अङ्ग्रेजी भाषामा कमजोर छन् । अनिवार्य अङ्ग्रेजी विषयको पुस्तक नै अङ्ग्रेजी भाषामा नपढाइरहेको अवस्थामा अन्य विषय अङ्ग्रेजीमा पढाउन सक्लान् जस्तो लाग्दैन ।”
नेपाल शिक्षक युनियनका उपाध्यक्ष पूर्णा जोशीले तालिम नदिइएमा शिक्षकहरुले अङ्ग्रेजी माध्यमबाट अध्यापन गर्न नसक्ने स्पष्ट गर्दै अङ्ग्रेजी भाषामा पढाउन सक्लान्, तर भाव व्यक्त गर्न नसक्ने अवस्था रहन्छ भन्नुभयो ।
देशभरिमा हाल ३४ हजार ७८२ सामुदायिक विद्यालय छन् भने तिनमा सबै खाले गरी करिव दुई लाख शिक्षक कार्यरत छन् ।
Source:www.gorkhapatraonline.com