भूमिराज शर्मा
पर्वत, ८ कार्तिक
आजको आवश्यकता, प्रविधियुक्त गुणस्तरीय शिक्षा भन्ने मुल नाराका साथ २५ बर्ष पहिले स्थापित जिल्लाको साँच्चिकै नमुनाको रुपमा रहेको नमुना आवासीय उमाविको साताव्यापी रजत महोत्सवको एक भव्य समारोहका बीच शुभारम्भ गरिएको छ । शुक्रबार विद्यालय प्राङ्गणमा आयोजित एक विशेष कार्यक्रमकाबीच महोत्सवको शुभारम्भ गरिएको हो ।
कार्यक्रमको प्रमुख अतिथिको रुपमा बोल्दै जिल्ला शिक्षा कार्यालय पर्वतका जिल्ला शिक्षा अधिकारी घनश्याम पौडेलले संस्थागत विद्यालयको तुलनामा सामुदायिक विद्यालयमा राज्यले धेरै लगानी गरेको भए पनि आशातित उपलब्धि हासील हुन नसकेको बताउनु भयो । जिशिअ पौडेलले भन्नु भयो–अब विद्यालयको संख्यात्मक बृद्धि भन्दा गुणात्मक अभिबृद्धिमा जोड दिनु आवश्यक भैसकेको छ । अभिभावकको चाहना अनुसार शैक्षिक गुणस्तर बढाउन सामुदायिक विद्यालयहरुले संस्थागत विद्यालयबाट सिको गर्नु पर्नेमा पौडेलले जोड दिनु भयो ।
उक्त शुभारम्भ समारोहमा विद्यालयका शिक्षक एवं साहित्यकार अन्तिम गुरुङद्धारा लिखित कृति आजाद ध्वनिको विमोचन गरिएको थियो । सो कृतिको बारेमा प्रकाश पार्दै साहित्यकार एवं समालोचक राजेन्द्र पहाडीले पर्वतले गुरुङ जस्तो एक उदियमान साहित्यकार जन्माउनु गौरबको कुरा भएको विचार व्यक्त गर्नु भयो । कार्यक्रममा ०६९ सालको बार्षिक परीक्षा लगायत विभिन्न विधामा उत्कृष्ट स्थान हासील गर्न सफल विद्यार्थीहरुलाई पुरस्कार वितरण गरिएको थियो । कार्यक्रमको बीच बीचमा विद्यार्थीहरुले विविध साहित्यिक र सांस्कृतिक प्रस्तुतिहरु राखेका थिए ।
कार्यक्रममा प्याब्सन पर्वतका अध्यक्ष केशवराज पुरी, एन प्याब्सन बाग्लुङका अध्यक्ष बालकृष्ण शर्मा, अखिल नेपाल शिक्षक संगठनका केन्द्रिय सदस्य भूमिराज शर्मा, देउपुर नमुना आवासीय माविका प्रिन्सिपल बलराम शर्मा, अभिभावक यम प्रसाद शर्मा लगायतले शुभकामना मन्तव्य व्यक्त गर्नु भएको थियो । सो अवसरमा विद्यालयका प्रिन्सिपल यमप्रसाद शर्माले विद्यालयको प्रगति विवरण प्रस्तुत गर्नु भएको थियोे भने कार्यक्रमको संचालन सहायक प्रिन्सिपल खेमराज शर्माले गर्नुभएको थियो ।
रजत महोत्सवककै अवसर पारेर विद्यालयले बिहीबार पत्रकार र प्याब्सनबीच मैत्रीपूर्ण फुटवल खेल सम्पन्न गरिसकेको छ भने शुक्रबार विद्यालय प्राङ्गण समेत टोल, मूल सडक सफाई र सरसफाई सम्वन्धी जापानी स्वयम्सेवकबाट विद्यार्थीहरुलार्ई तालिम र शोभायात्रा सम्पन्न गरेको छ ।
विद्यालयका प्रिन्सिपल यमप्रसाद शर्माले दिनु भएको जानकारी अनुसार आज शनिबार सदरमुकाम स्थित शिक्षण संस्थाका शिक्षकहरुबीच प्रतियोगितात्मक भलिबल खेल र सदरमुकाम स्थित विद्यालयका विद्यार्थीहरुबीच भलिबल प्रतियोगिता हुँदैछ । यसैगरी १० गते रक्तदान शिविर सञ्चालन, ११ गते जिल्ला स्तरीय अन्तर मावि हाजिरी जवाफ प्रतियोगिता र अभिभावक, विद्यार्थी स्तरीय चेस प्रतियोगिता (आन्तरिक), चित्रकला प्रतियोगिता, १२ गते जनशक्ति पलायन र यसको समाधान शीर्षकमा अन्तर मावि, उमावि तहको अञ्चल स्तरीय(संयुक्त) वक्तृत्व प्रतियोगिता, १३ गते महिला शिक्षकहरुको म्युजिकल चियर गेम र पोते माला उन्ने प्रतियोगिता, कक्षा एक पाँचका लागि म्युजिकल चियर गेम र दौड, पुरुष अभिभावकका लागि ठेलो फाल्ने र घैटो फुटाउने खेल संचालन हुने जनाइएको छ ।
महोत्सवको अन्तिम दिन १४ गते रजत जयन्ती समारोह मूल कार्यक्रम अन्तर्गत रजत जयन्ती स्तम्भ अनावरण, दिप प्रज्वलन, व्यानर उद्घाटन, बेलुन उडाउने, परेवा उडाउने विविध सांस्कृतिक कार्यक्रम, पुरस्कार वितरण, सम्मान, उपहार, मायाको चिनो प्रदान र विविध कार्यक्रमका साथ रजत महोत्सव समापन गरिने विद्यालयले जानकारी दिएको छ ।