दाङ, मङ्सिर १५ गते । दाङका विभिन्न सामुदायिक विद्यालयहरूमा बर्सेनि करोडौँ रुपियाँ बजेट जाने गरे पनि त्यसको खासै सदुपयोग नभएको पाइएको छ । जिल्ला शिक्षा कार्यालय दाङको नियमित तथा प्रभावकारी अनुगमन नहुँदा जिल्लाका विभिन्न सामुदायिक विद्यालयमा पठाइने बजेटको सदुपयोग नभएको जिल्लाका सरोकारवालाहरू बताउँछन् ।
हरेक वर्ष शिक्षा कार्यालयले विभिन्न शीर्षकमा विद्यालयलाई बजेट पठाउँदै आएको छ । कार्यालयका अनुसार विद्यालयमा दिवा खाजा, कम्प्युटर शिक्षा, मुक्तकमलहरी छात्रवृत्ति, बाल विकास केन्द्र अनुदान, छात्रा छात्रवृत्ति, दलित छात्रवृत्ति, माध्यमिक शिक्षा छात्रवृत्ति कार्यक्रमका लागि बजेट पठाउने गरिएको छ । त्यस्तै विद्यालय कर्मचारी अनुदान, अपाङ्ग विद्यार्थीलाई छात्रवृत्ति, भौतिक पूर्वाधार, पाठ्यपुस्तक खरिदलगायतका विभिन्न शीर्षकमा बजेट पठाउने गरिएको जिल्ला शिक्षा कार्यालय दाङका उप–सचिव ओमप्रकाश न्यौपानेले जानकारी दिनुभयो । उहाँले शिक्षा कार्यालयबाट विभिन्न शीर्षकमा छुट्याइएको बजेट विद्यालयको बैंकमा रहेको खातामा निकासा मात्र गर्ने गरेको जानकारी दिनुभयो । ‘हामीले सामुदायिक विद्यालयका लागि सरकारले पठाएको बजेट निकासा मात्र गर्ने गरेका छांै, निकासा भएको बजेट सदुपयोग भएको छ या छैन भनी कार्यालयलाई थाहा हुने कुरो भएन’, अगाडि उहाँले भन्नुभयो, ‘यदि बजेट दुरुपयोग भएको भए विद्यालयका अभिभावक, विद्यार्थीले गुनासो गरिहाल्नुहुन्थ्यो नि । ’
उप–सचिव न्यौपानेले नयाँ कार्यक्रम सुरु हुँदाखेरी जिल्लाका केही विद्यालयमा निकासा गरिएको बजेटको दुरुपयोग हुने गरेको गुनासो आए पनि अहिले त्यस्ता गुनासा नआएको बताउनुभयो । यद्यपि, जिल्ला शिक्षा अधिकारी जीतबहादुर शाहले अघिल्ला वर्षहरूमा कार्यालयबाट पठाइने विभिन्न शीर्षकका
बजेटको दुरुपयोग भएको विषयमा गुनासो आए पनि यस वर्ष कार्यालयमा कुनै गुनासो नआएको दावी गर्नुभयो ।
कार्यालयका अनुसार विभिन्न शीर्षकमा छुट्याइएको बजेटमध्ये यस वर्ष कमलहरी छात्रवृत्तिका लागि विद्यालयमा ३३ लाख रुपियाँ बजेट पठाइने भएको छ । कमलहरी छात्रवृत्ति एक हजार आठ सय जनालाई वितरण गरिने कार्यालयले जनाएको छ । जसमध्ये कक्षा १–८ कक्षासम्मका विद्यार्थीलाई प्रतिविद्यार्थी एक हजार पाँच सय रुपियाँ, ९–१० कक्षासम्मका विद्यार्थीलाई एक हजार आठ सय रुपियाँ, उच्च
माविका तहका विद्यार्थीलाई प्रतिविद्यार्थी पाँच हजार रुपियाँ र स्नातक तहमा अध्ययनरत मुक्त कमलहरीहरूलाई छात्रवृत्ति प्रदान गरिंदै
आएको छ । कार्यालयले देउखुरीको मर्ती होस्टेलमा अध्ययनरत एक सय १० जना पूर्व कमलहरी विद्यार्थीलाई १० महिनाका लागि तीन हजारका दरले रुपियाँ पनि उपलब्ध गराउँदै आएको छ तर, हरेक वर्ष मुक्त कमलहरीको छात्रवृत्ति रकम पठाउँदै आएको शिक्षा कार्यालयले बताए पनि विभिन्न सार्वजनिक कार्यक्रममा मुक्त कमलहरीले पैसा नपाएको गुनासो गर्दै आएका छन् ।
उनीहरूले विद्यालयका प्रधानाध्यापक, विद्यालय व्यवस्थापन समितिका पदाधिकारी, शिक्षा कार्यालयको मिलेमतोमा विद्यार्थीलाई प्रदान गरिने विभिन्न किसिमका छात्रवृत्तिमा अनियमितता हुने गरेको आरोप लगाउँदै आएका छन् ।
त्यस्तै जिल्लाका चार सय २४ वटा सामुदायिक विद्यालयलाई विद्यालय कर्मचारी अनुदानअन्तर्गत मावि र उमावितर्फ वार्षिक एक लाख ७५ हजार रुपियाँ, निमावितर्फ ७५ हजार रुपियाँ, १–७ कक्षासम्म सञ्चालित विद्यालयलाई ३९ हजार रुपियाँ र चार कक्षासम्म सञ्चालित विद्यालयलाई २७ हजार रुपियाँका दरले बजेट विद्यालयको खातामा निकासा गरिने बताइएको छ ।
शिक्षा कार्यालयले दिवा खाजा कार्यक्रम एक सय ३७ वटा विद्यालयमा लागू भएको जानकारी दिएको छ । उक्त कार्यक्रमबाट १८ हजार ११ सय ८५ जना विद्यार्थीलाई विद्यालय सञ्चालन भएको प्रतिदिन १२ रुपियाँका दरले खाजा रकम प्रदान गरिने कार्यालयको भनाइ छ ।
यसैगरी विद्यार्थीको पाठ्यपुस्तक खरिदका गर्न प्राथमिक तहमा ४२ हजार पाँच सय ५५ जनाका लागि ७१ लाख ४० हजार रुपियाँ, निमावि तहमा ३० हजार चार सय २९ जना विद्यार्थीका लागि एक करोड १५ लाख ११ हजार रुपियाँ र मावि तहमा १४ हजार सात सय ६ जना विद्यार्थीका लागि ६३ लाख ४५ हजार रुपियाँ उपलब्ध गराइएको छ ।
शिक्षा कार्यालयका उप–सचिव न्यौपानेका अनुसार सम्बन्धित विद्यालयका नाममा रहेका
खाताहरूमा विभिन्न शीर्षकका बजेट निकासा गर्ने कार्य भइरहेको जानकारी दिनुभयो ।
source:www.gorkhapatraonline.com