बाजुरा, माघ १५ गते । गत माघ १ गतेदेखि सुरु गरिने भनिएको राष्ट्रिय साक्षरता अभियान बाजुराका केही गाविसमा डेढ हप्ता बितिसक्दा पनि सञ्चालनमा आउन सकेको छैन । बाजुराको उत्तरी क्षेत्रका कतिपय गाविसमा सो अभियान सुरु नभएको हो ।
बाजुराका १७ वटा गाविसका २२ हजार ७५४ जनालाई साक्षर बनाउने लक्ष्य लिइएको साक्षरता अभियान बाजुरामा अन्य जिल्लामा भन्दा ढिलो सुरु हुँदा सम्बन्धित जनतामा निराशा छाएको छ ।
समयमै साक्षरता कक्षा सञ्चालन हुन नसकेको गाविसमा एक वाई गाविस पनि हो । वाई गाविसमा हालसम्म पनि साक्षरता कक्षा सञ्चालन नभएको स्थानीयवासीले बताएका छन् । उत्तरपूर्वी क्षेत्रका कतिपय गाविसमा भने निर्धारित समयभन्दा करिब एक हप्ता ढिलो गरी साक्षरता कक्षा सञ्चालन भएका छन् ।
जिल्ला शिक्षा अधिकारी गोविन्द्रप्रसाद पोखे्रलले जिल्लाका १७ वटा गाविसमा माघ १ गतेदेखि एकै साथ साक्षरता कक्षा सञ्चालनमा ल्याइने बताउनु भएको भए पनि उत्तरीक्षेत्रका कतिपय गाविसमा हालसम्म पनि साक्षरता कक्षा सञ्चालनमा आउन सकेका छैन ।
साक्षरता कक्षा सञ्चालनको जिम्मेवारी जिल्ला शिक्षा कार्यालय र सम्बन्धित गाविसका विद्यालयलाई हुने भए पनि जिल्ला शिक्षा कार्यालयले दसँै, तिहार र निर्वाचन भएको भन्दै अन्य जिल्लाको तुलनामा अढाइ महिना पछि कक्षा सञ्चालन गरिने जनाएको थियो ।
जिल्लामा विभिन्न समयमा साक्षरता कक्षा सञ्चालन गरिए पनि ती नाम मात्रका भएको र रकम कुम्ल्याउने काम मात्र भएको देखिएको छ भने निरक्षरहरु भने जस्ताका जस्तै रहेका छन् । यो वर्ष बाजुराका बाँधु, वाई, ब्रह्मतोला, छतारा, दहकोट, डोगडी, गुदुखाती, जुगाडा, जुकोट, काँडा, कोल्टी, कुलदेवमाडौँ, मार्तडी, पाण्डुसैन, रुगिन, साप्पाटा र तोली गाविसमा साक्षरता कक्षा सञ्चालन गरिने बताइएको थियो ।
साक्षरता कक्षा सञ्चालनका लागि जिल्ला शिक्षा कार्यालय बाजुराले ७९६ सहजकर्ता र ८० जना निरीक्षकलाई तालिमसमेत दिएको छ । रासस