काठमाडौं, चैत्र १८ - त्रिभुवन विश्वविद्यालयले सेमेस्टर प्रणालीअनुसार खुल्ला मोडबाट स्नाकोत्तर तहका पठनपाठन सुरु गरेको छ । खुल्ला तथा दूर सिकाइ कार्यक्रमअन्तर्गत देशका विभिन्न छ वटा क्याम्पसबाट यो प्रणालीमा पठनपाठन गरिए शिक्षशास्त्र संकायका डिन प्रकाशमान श्रेष्ठले जनाएका छन् ।
पूर्वाञ्चलमा सिरहाको सत्यनारायण सूर्यनारायण मरोबेत्ता बहुमुखी क्याम्पस, मध्यमाञ्चलमा सानोठिमी क्याम्पस र गोरखा बहुमुखी क्याम्पसमा पठनपाठन भएको छ । त्यसैगरी पश्चिमाञ्चलको बुटवल क्याम्पस, मध्यपश्चिमाञ्चलमा सुर्खेत शिक्षा क्याम्पस र सुदूरपश्चिमाञ्चलमा डडेलधुरा शिक्षा क्याम्पसमा खुल्ला मोडमा पढाइको व्यवस्था गरिएको छ ।
'सरकारले विद्यालय तहको संरचना परिवर्तन गरेसँगै शिक्षकको योग्यता बढाउन यो कार्यक्रम सुरु गरिएको हो,' डिन श्रेष्ठले कान्तिपुरसित भने, 'पढ्नको निम्ति लामो छुट्टी पनि नपाउने तर योग्यताचाहिं बढाउनु पर्ने परिस्थितिलाई मध्यनजर गरी खुल्ला सिकाइको पद्धतिको विकास गरिएको हो ।' विद्यालयको नयाँ संरचनाअनुसार कक्षा १ देखि ८ सम्म आधारभूत र ९ देखि १२ कक्षा माध्यमिक तह हुनेछ । त्यसनिम्ति माध्यमिक तह पढाउने शिक्षकको योग्यता स्नातकोत्तर हुनुपर्ने प्रावधान छ ।
त्रिविले स्नातकोत्तर तहका निम्ति यसरी खुल्ला मोडको पठनपाठन व्यवस्था गरेको हो । नेपाली शिक्षा, स्वास्थ्य शिक्षा र पाठ्यक्रम तथा मूल्यांकन गरी तीन विषयमा पठनपाठन सुरु गरिएको छ । आगामी वर्ष अंग्रेजी, गणित र अर्थशासत्र विषयमा समेत पठनपाठन गरिने छ । विद्यार्थीले आफू बसेकै ठाउँमा दैनिक स्वाध्ययन गर्नसक्छन् । समेस्टर प्रणालीअनुसार हरेक छ महिनामा एकपटक परीक्षा दिनुपर्नेछ ।
'पहिलो पटक भएकोले दुई वर्षको सट्टा तीन वर्षमा पूरा गर्ने नीति अपनाइएको छ,' डिन श्रेष्ठले भने, 'विद्यार्थी तीनवर्षभित्र स्नातकोत्त पास गरिसक्छन् भन्ने उद्देश्यले यो नीति अपनाइएको हो । आगामी वर्षदेखि चार समेस्टर नै कायम हुनेछ ।' विद्यार्थीलाई सुरुमा अभिमुखीकरण दिइएका छन् । त्यसपछि हरेक सेमेस्टरको बीचमा क्याम्पस सम्पर्क राख्दछन् । कलेजले विद्यार्थी स्वाध्ययन सामग्री उपलब्ध गराएको छ भने अनलाइन, मोबाइल, टेलिफोन, स्काइप, भिडियोका माध्यमबाट अध्ययन सामग्री प्राप्त गर्न सक्छन् ।
विद्यार्थीले हरेक सेमेस्टरको १५ हजार रुपैयाँ शुल्क बुझाउनु पर्दछ । पहिलो पटक लागू भएको खुल्ला सिकाइ पद्धतिमा देशभरिमा करिब १ सय ३० जना विद्यार्थी भर्ना भएका छन् । पठनपाठनका निम्ति ७२ जना शिक्षकलाई तालिम दिइएका छन् । त्यसनिम्ति फिनल्याण्डको एक विश्वविद्यालयले सहयोग गरेको डिन श्रेष्ठले जनाएका छन् ।
Source: http://www.ekantipur.com/np/2070/12/18/full-story/386651