सल्लेरी, जेठ १४ गते । सोलुखुम्बुको माथिल्लो हिमाली क्षेत्र खुम्बु क्षेत्रका विद्यालय अनुगमणका क्रममा जिल्ला शिक्षा अधिकारी संकर कार्कीले २ वटा विद्यालयमा विद्यार्थी संख्या शुन्य रहेको भेटाउनु भएको छ ।
खुम्बु क्षेत्रमा रहेका चौरीखर्क, नाम्चे र खुम्जुङ गाविसमा रहेका विद्यालयहरुको अनुगमण निरिक्षणका क्रममा चौरीखर्क गाविसको कर्म जनसेवा प्राथमिक विद्यालय स्याङमा र नाम्चे गाविसमा रहेको नाम्चे प्राथमिक विद्यालय ठमोमा विद्यार्थी संख्या शुन्य भेटिएको जिशिअ शंकर कार्कीले बताउनु भयो ।
जिशिअ कार्कीका अनुसार एक जना शिक्षकको दरबन्दी रहेको कर्म जनसेवा प्रावि चौरीखर्कका शिक्षक बिरामी बिदामा रहेको कारण त्यहाँका सबै विद्यार्थी छिमेकी विद्यालयमा भर्ना भएको र २ जना शिक्षकको दरबन्दी रहेको नाम्चे प्रावि ठमोमा रहेका एक जना विद्यार्थीले मात्र अध्ययन गर्दै आएको भएपनि पछिल्लो समयमा नजिकैको थामे निमाविमा पढ्न गएपछि विद्यार्थी संख्या शुन्य भएको हो ।
दुईवटै विद्यालय क्षेत्रका अभिभावक र सरोकारवालाहरुसँग छलफल गरी जिशिअ कार्कीले ति दुईवटा विद्यालय तत्कालका लागि बन्द गर्ने बताउनु भएको छ । जिशिअ कार्की आफु कार्यालयमा फर्केपछि आवश्यक प्रक्रिया पुरा गरी ति दुईवटै विद्यालयका शिक्षकलाई अन्यत्र काजमा पठाउने र त्यो क्षेत्रको विद्यालय सञ्चालनको आवश्यकता बोध नहुञ्जेलका लागि विद्यालय बन्द गर्ने बताउनुभयो ।
स्थानीय अगुवा तथा त्यहाँ रहेका संघसंस्थाहरुसग भएको छलफलपछि नाम्चे प्रावि ठमोको चल अचल सम्पति संरक्षण र संबद्र्धनको जिम्मा ठमु सगरमाथा मध्यवर्ती क्षेत्र व्यवस्थापन समुहलाई दिने समेत निर्णय भएकोछ ।
जिशिअ कार्कीले विद्यार्थी संख्या शुन्य रहेको अवस्थामा विद्यालय सञ्चालनको आवश्यकता नभएको भन्दै कार्यालयमा फर्कनसाथ यसबारे निर्णय गर्ने बताउनुभयो ।