१५ श्रावण, काठमाडौँ । सामुदायिक विद्यालयका विद्यार्थीहरुले एक दशकपछि खुला प्रतिस्पर्धाबाट छनोट भई योग्य ठहरिएका शिक्षकहरु पाउन थालेका छन् । हालसम्म धादिङ, ललितपुर, मनाङ, डोल्पा, दोलखा लगायतका जिल्लाले त्यस्ता शिक्षकलाई नियुक्तिपत्र दिइसकेको छ र कतिपय जिल्लाका शिक्षकहरु कक्षामा प्रवेश गरिसकेका छन् । दोलखाका जिल्ला शिक्षा अधिकारी दिपक शर्माले भन्नुभयो, “शिक्षक सेवा आयोगबाट सिफारिस भएका माध्यमिक र निम्न माध्यमिक तहका शिक्षकहरु कक्षाकोठामा पुगेर अध्यापन थालिसकेका छन् ।” यसअघि २०५२ सालमा लिइएको खुला प्रतिस्पर्धाको नतिजा प्रकाशित भई २०६० सालमा त्यस्ता शिक्षकलाई विद्यालयमा पठाइएको थियो ।
सामुदायिक विद्यालयका विद्यार्थीहरुले त्यस्ता शिक्षकहरु विहीबारबाट पाउने भएका छन् । आयोगले छनोट गरेका १२७ जना शिक्षकलाई ललितपुरको जिल्ला शिक्षा कार्यालयले वुधबार अभिमुखीकरण तालिम प्रदान गरेको छ । जिशिकाले उनीहरुलाई विहीबारदेखि नै विद्यालयमा हाजिर हुन निर्देशन दिएको छ । ललितपुरका जिल्ला शिक्षा अधिकारी शिवकुमार सापकोटाले भन्नुभयो, “उच्च प्रतिस्पर्धाबाट छानिएका यी शिक्षकहरुलाई विहीबारबाट नै सामुदायिक विद्यालयहरुमा देख्न सकिनेछ ।” अभिमुखीकरणमा सहभागी हुन आएका शिक्षकहरु निकै उत्साहित पनि देखिएका छन् । उनीहरुले सामुदायिक विद्यालयको शैक्षिक गुणस्तरमा सुधार गर्ने सामूहिक प्रतिवद्धता व्यक्त गर्नुका साथै आगामी वार्षिक परीक्षाको नतिजाले यस कुराको पुष्ट्याँइ गर्ने दावी गरे ।
माध्यमिक तहको अङ्ग्रेजी विषयका शिक्षक राधेश्याम ठाकुर यसअघि ललितपुरमा अस्थायी शिक्षकका रुपमा कार्यरत हुनुहुन्थ्यो । यस पटकको परीक्षाबाट स्थायी हुने अवसर पाउनुभएका उहाँले विगतमा अस्थायी भएका कारण विद्यालय प्रशासनले जागिर खाइदेला कि भन्ने डरले गुणस्तर र पठनपाठन सुधारसम्बन्धी कुनै विधि प्रयोग गर्ने आँट नगरेको बताउनुभयो । “अब शैक्षिक सुधारका लागि नयाँ विधिहरु कार्यान्वयन गर्नेछु भनेर आत्मविश्वास बढेको छ” उहाँले भन्नुभयो । पाटन माविमा नियुक्ति पाउनुभएकी अनिता पौडेलका लागि सामुदायिक विद्यालयमा अध्यापन गर्ने पहिलो अनुभव हो । उहाँले आफू प्रतिवद्ध भएर अध्यापन गर्ने बताउँदै भन्नुभयो, “धेरै राम्रो काम गर्ने इच्छा छ, तर त्यसअघि सरकारले हामीलाई शिक्षणसम्बन्धी तालिम दिनुपर्दछ ।” ती शिक्षकहरुलाई प्रशिक्षण दिँदै ललितपुर जिशिअ सापकोटाले सामुदायिक विद्यालयको शैक्षिक गुणस्तर निकै खस्किएको बताउनुभयो । “छनोट भएका शिक्षकहरुबाट सामुदायिक विद्यालयको नतिजा सुधारको अपेक्षा गरिएको छ । विद्यार्थीप्रति जिम्मेवार हुनुहुनेछ भन्नेमा पूर्ण विश्वस्त छौँ” उहाँले भन्नुभयो ।