म्याग्दी, साउन १३ गते । जिल्लाको पाउद्वार मावि शिख र हिमाञ्चल उच्च मावि नागीले चौँरीगाईको आलो रगत बेचेर एकै मौसममा रु तीन लाख आम्दानी गरेका छन् ।
शिख–६ स्थित खोप्रालेकमा साताव्यापी रुपमा सञ्चालन गरिएको रगत पिउने मेलाबाट ती विद्यालयले उक्त आम्दानी गरेका हुन् ।
शिख र राम्चे गाविसमा पर्ने यी दुई विद्यालय सञ्चालनका लागि वर्षको दुईपटक संयुक्त चौँरीपालन समितिमार्फत रगत पिउने मेला सञ्चालन हुँदै आएको छ । यसवर्षको पहिलो मौसममा व्यवस्थापन खर्च कटाएर रु तीन लाख १२ हजार आम्दानी भएको समितिका अध्यक्ष रुद्र मगरले जानकारी दिनुभयो ।
सरकारले विद्यालय सञ्चालनका लागि दरबन्दी उपलब्ध नगराएपछि हिमाञ्चल उच्च मावि नागी र पाउद्वार मावि पाउद्वार सञ्चालनार्थ समाजसेवी महावीर पुनको पहलमा २०५३ सालदेखि यस्तो विकल्प अपनाइएको हो । यसपटक ५५० जनाले रगत पिएको समितिका अध्यक्ष मगरले जानकारी दिनुभयो ।
समितिले खोप्रालेकमा २५० वटा चौँरी पालेका छन् । उच्च हिमाली भेगमा पाइने यार्सागुम्बा, जटामसी, निरमसी र पाँचऔले जस्ता बहुमूल्य जडीबुटी खाएर बाँचेका चौँरीगाईको आलो रगत पिएमा ग्यास्ट्रिक, गानोगोला, बाथ, शारीरिक कमजोरी र हाडजोर्नीसम्बन्धी रोग निको हुनुका साथै शारीरिक स्फुर्ती बढ्ने जनविश्वासले हरेक वर्ष सर्वसाधारण चौँरीको रगत पिउन जाने गरेका छन् ।
प्रतिगिलास रु ८० का दरले रगत बिक्री हुने मेलामा हरेक वर्ष सर्वसाधारणको आकर्षण बढ्दै गएको र मेलाबाट भएको आम्दानीले विद्यालय सञ्चालन गर्न केही सहज भएको पाउद्वार मावि व्यवस्थापन समितिका अध्यक्ष कृष्णबहादुर तिलिजाले जानकारी दिनुभयो ।
यो मौसमको आम्दानीमध्ये व्यवस्थापन खर्च कटौती गरेर दुई विद्यालयलाई रु ८६÷८६ हजार बाँडिएको छ । त्यस्तै दुई जना चौँरी हेरालोलाई रु ७०÷७० हजार तलब उपलब्ध गराइएको संयुक्त चौँरीपालन समितिले जनाएको छ ।
साउन ७ देखि ११ गतेसम्म सञ्चालन भएको मेलामा रगत पिउन म्याग्दीका विभिन्न गाविसका साथै छिमेकी जिल्ला पर्वत, बागलुङ, कास्की र धादिङबाट समेत सर्वसाधारण खोप्रालेक पुगेका थिए । विशेष प्रकारको छुराको सहयोगले चौँरीगाईको घाँटीबाट २० देखि २५ गिलासम्म रगत निकाल्ने र यसरी रगत निकाल्दा चौँरीगाईको स्वास्थ्यमा कुनै असर नपर्ने समितिका सचिव भीम पुनले बताउनुभयो । रासस