काठमाडौँ, भदौ १५ गते । विद्यालय तहको कक्षा १२ सम्म प्राविधिक र व्यावसायिक शिक्षा दिलाउने सरकारको नीति रहे पनि पाठ्यक्रम निर्माण, परीक्षा सञ्चालन, अनुगमन र व्यवस्थापनमा शिक्षा विभाग र प्राविधिक शिक्षा तथा व्यावसायिक शिक्षा परिषद् (सिटिइभिटी) बीच जिम्मेवारी बाँडफाँडको विवाद देखिएको छ ।
सरकारले २०६४ सालदेखि कार्यान्वयनमा ल्याएको विद्यालय क्षेत्र सुधार कार्यक्रम (एसएसआरपी) मा कक्षा १२ सम्म माध्यमिक शिक्षा मान्ने र कक्षा ९ देखि प्राविधिक विषयमा अध्ययन गर्न चाहने विद्यार्थीलाई सो सुविधा दिने उल्लेख छ ।
सोहीअनुसार हाल कक्षा ९ र १० का लागि सिटिइभिटीले तयार गरेको पाठ्यक्रमका आधारमा देशका विभिन्न जिल्लामा व्यावसायिक विद्यालयमा पनि अध्यापन भइरहेको छ । ती विद्यार्थीले कक्षा १० पछि कुन निकायले तयार गरेको पाठ्यक्रम पढ्छन् भन्ने यकिन हुन सकेको छैन ।
बसुन्धरास्थित एक्टिभ कलेजले आज यहाँ आयोजना गरेको ‘शिक्षा क्षेत्रका चुनौती’ विषयक छलफल कार्यक्रममा सिटिइभिटीका परीक्षा नियन्त्रक शिवशङ्कर घिमिरेले शिक्षा ऐन संशोधनको क्रममा रहेको र कक्षा ११ र १२ को पाठ्यक्रम तयारीका लागि शिक्षा विभागले पाठ्यक्रम विकास केन्द्रलाई आग्रह गर्ने सुनिएको बताउँदै यसमा परिषद्को भूमिका स्पष्ट नभएको बताउनुभयो ।
उहाँले शिक्षा मन्त्रालयले लागू गर्ने नीतिको पालना गर्नु सबै निकायको जिम्मेवारी भए पनि परिषद्ले गर्न सक्ने काममा यसलाई परिचालन गर्नुपर्ने बताउनुभयो ।
कार्यक्रममा राष्ट्रिय योजना आयोगका सदस्य डा चन्द्रमणि अधिकारीले शिक्षा क्षेत्रमा सरकारले लगानी गरेअनुसारको प्रतिफल आउन नसकेको धारणा राख्नुभयो ।
शिक्षाविद् डा तीर्थराज खनियाँले शिक्षा क्षेत्रमा व्यक्तिका कारण उत्पन्न हुने खराबी कमजोरीलाई सिङ्गो प्रणाली नै ध्वस्त भयो भन्ने ढङ्गले चित्रण गर्न नहुनेमा जोड दिनुभयो ।
कलेजमा संस्थापक प्रिन्सिपल डा गोपीलाल न्यौपानेले शिक्षा क्षेत्रका समग्र समस्याको सम्बोधन गर्न शिक्षा मन्त्रालय र मातहतका निकायले सरोकारवालाको सुझावलाई ग्रहण गर्नुपर्ने बताउनुभयो । रासस