भदौ १५ गते ,काठमाडौँ । दुई जना उपनिर्देशकले धानेको पश्चिमाञ्चल क्षेत्रीय शिक्षा निर्देशनालयमा यतिबेला ११ जना उपनिर्देशकलाई थुपारिएको छ ।
भएका उपनिर्देशकलाई ‘काम’ दिन नसकेको क्षेशिनि पोखराले शिक्षा मन्त्रालयले थपिदिएका पाँच जना उपनिर्देशकलाई कुनै जिम्मेवारी दिन सकेको छैन ।
त्यसैले काजमा थुपारिएका उपनिर्देशकहरु दैनिक हाजिर गर्छन्, केहीबेर गफगाफ गर्छन्, फेसबुक चलाउँछन् र घरतिर लाग्छन् ।
पश्चिमाञ्चल क्षेत्रीय शिक्षा निर्देशक बिदामा काठमाडौँमा आउनुभएकाले मन्त्रालयले कति जना उपनिर्देशकलाई काजमा क्षेशिनिमा पठाएको छ भन्ने जानकारी नै छैन ।
मन्त्रालयले तीन महिनाका लागि भनेर पर्वत जिल्ला शिक्षा कार्यालयका हेमनारायण चापागाँई र घनश्याम पौडेललाई, स्याङ्जा जिशिकाका दयाराम गौतम र योगेन्द्र पराजुलीलाई र बर्दिया जिशिकाका विष्णुप्रसाद पराजुलीलाई काजमा क्षेशिनि पोखरामा पठाइदिएको छ ।
काजमा आउनुभएका उपनिर्देशक विष्णुप्रसाद पराजुलीले आफू काजमा आएको २० दिन जति भएको बताउँदै भन्नुभयो, “खासै कामको जिम्मेवारी पाएका छैनौँ । काज तीन महिनाका लागि भएकाले जिम्मेवारी नै नपाई बर्दिया फर्किने अवस्था छ ।”
विगतमा क्षेत्रीय शिक्षा निर्देशनालयमा परीक्षा, विद्यालय र प्रशासन शाखा हेर्ने गरी एक जना र योजना, कार्यक्रम र अनुगमन शाखा हेर्ने गरी अर्का एक जना उपनिर्देशकको व्यवस्था हुने गरेकोमा केही महिनायता आठ वटा शाखा टुक्रयाइएको छ ।
नयाँ शाखाहरुमा विद्यालय व्यवस्थापन, परीक्षा तथा मूल्याङ्कन, योजना तथा कार्यक्रम समन्वय, अनौपचारिक तथा सहकार्यकलाप, अनुगमन तथा निरीक्षण, शिक्षक व्यवस्थापन, शैक्षिक गुणस्तर तथा सूचना र प्रशासन तथा समसामयिक शिक्षा गरी आठ शाखा थपिएका छन् ।
क्षेशिनि पोखरामा कार्यरत आठ मध्ये दुई जना टोपबहादुर श्रेष्ठ र मोतिलाल शर्मालाई जिल्ला शिक्षा अधिकारी बनाएर अन्यत्र लगिए पनि काजमा ल्याइएका उपनिर्देशकहरुलाई रिक्त दुई शाखाको जिम्मेवारी दिइएको छैन ।
क्षेत्रीय शिक्षा निर्देशक दिव्यकला श्रेष्ठ बजिमयले कतिजना काजमा आएको भन्ने यकिन नभएको बताउँदै थप्नुभयो, “केही महिनाका लागि उहाँहरुलाई काजमा ल्याइएको हो । उहाँहरु फर्किहाल्नुहुन्छ ।”
पश्चिमाञ्चलको क्षेशिनिमा उपनिर्देशकको सङ्ख्या बढी भए पनि मध्यमाञ्चलको क्षेशिनिमा भने उपनिर्देशकहरु नहुँदा काममा समस्या पर्न गएको छ ।
मध्यमाञ्चल क्षेशिनि हेटौडामा आठ जना उपनिर्देशकको दरबन्दी भए पनि हाल चार जनामात्र कार्यरत हुनुहुन्छ । त्यहाँ कार्यरत कुनै उपनिर्देशक मन्त्रीको स्वकीय सचिव बन्न जानुभएको छ भने कुनै अन्य जिल्लामा काजमा लगिनु भएको छ ।
क्षेत्रीय शिक्षा निर्देशक कृष्णप्रसाद काप्रीले आठ वटा शाखा बनाइएको र सोही अनुसार आठ जनालाई जिम्मेवारी दिइएको बताउँदै भन्नुभयो, “तर अहिले चार जनामात्र हुनुहुन्छ । त्यसले गर्दा काममा असर परेको छ । क्षेशिनिको कार्य सम्पादनलाई चुस्त बनाउन समस्या भएको छ ।”
पूर्वाञ्चलको क्षेशिनिमा कार्यरत आठ उपनिर्देशकमध्ये दुई जनालाई अन्यत्र काजमा लगिएको छ ।