पर्वत, कार्तिक १३ : पर्वतको पाङ गाविसको मालढुङ्गामा रहेको श्रमिक प्राथमिक विद्यालयमा पढ्ने बालबालिकालाई दक्षिण कोरियामा रहेको ‘सोफिया हायर सेकेन्डरी स्कुल’ले सहयोग गरेको छ ।
बाग्लुङ र पर्वतको सिमानामा रहेको मालढुङ्गामा बस्ने श्रमिकहरूको बालबालिकालाई पढाउने उद्देश्यले २०६६ सालमा जिफन्टको सहयोगमा सो विद्यालय स्थापना भएको हो ।
सो विद्यालयमा पढ्ने ३५ जना विद्यार्थीलाई जाडोका लागि ज्याकेट, स्विटर तथा विभिन्न शैक्षिक सामग्री हस्तान्तरण गरिएको हो । मालढुङ्गामा बस्ने सुकुम्बासी श्रमिकहरूलाई काम र तिनका आश्रित बालबालिकालाई शिक्षा दिने उद्देश्यले सो विद्यालय स्थापना गरिएको विद्यालयका संस्थापक अध्यक्ष तथा जिफन्टका जिल्ला अध्यक्ष शिवप्रसाद पौडेलले बताए ।
वर्षभरि गिट्टी कुट्ने र बालुवा चालेर जीविका चलाउने श्रमिकहरूले बालबालिकालाई शिक्षा दिन नसक्दा उनीहरूको भविष्य अन्धकार बन्ने अवस्था आएकाले विभिन्न दातृ संस्थाको सहयोगमा सो विद्यालय स्थापना गरिएको पौडेलले बताए ।
कक्षा ३ सम्म पढाइ हुने सो विद्यालयमा आवश्यक भवन तथा कोठा नहुँदा एउटै कोठामा दुईवटा कक्षा सञ्चालन गर्नुपरेको विद्यालयका प्रअ तेजेन्द्र आचार्यले बताए । पाँच कक्षासम्म सञ्चालनको अनुमति भए पनि विद्यालयसँग पर्याप्त स्रोत नहुँदा ३ कक्षामात्रै सञ्चालन गर्नुपरेको उनको भनाइ छ ।
कक्षा ३ भन्दा माथि पढ्न जान बालबालिकालाई समस्या भएको र बीचैमा पढाइ छाड्ने गरेकाले ५ कक्षासम्म सञ्चालन गर्न आवश्यक भएकाले भवन निर्माणका लागि पहल गरिदिन उनले हाँले आग्रहसमेत गरे ।