काठमाडौं, १२ माघ । विभिन्न प्राविधिक विषयहरुमा अध्यापन गराउने शिक्षकको अभावलाई महसुस गर्दै सरकारले त्यस्ता शिक्षकहरुलाई लाइसेन्स बिना नै पढाउन दिने भएको छ । मन्त्रीपरिषदको बैठकले शिक्षक सेवा नियमावली संशोधन गरेपछि यो सम्भव भएको हो । सरकारको यो निर्णयसँगै अब विज्ञान, लेखा, गणित, कम्प्युटर, बालीविज्ञान लगायतका प्राविधिक विषयमा उच्च शिक्षा अध्ययन गरेकाहरुले शिक्षक अनुमति परीक्षामा सहभागी नभएरै पनि अध्यापन गर्न पाउनेछन् ।
विज्ञान, गणित लगायतका प्राविधिक विषयहरुमा शिक्षक अनुमति पत्र भएका शिक्षकहरुको अभावका कारण शिक्षाको गुणस्तर नै खस्किएको थियो । देशका अधिकांश स्थानमा प्राविधिक विषयहरुमा शिक्षकको अभाव भइरहेको खबरहरु सार्वजनिक भएपछि सरकारले शिक्षक सेवा नियमावली संशोधन गरेको हो । सरकारको यो निर्णयसँगै विषयगत शिक्षकहरुको आन्तरिक र खुल्ला प्रतिस्पर्धामार्फत शिक्षण सेवामा प्रवेश गर्न पाउनेछन् । यसले राम्रा र योग्य शिक्षकहरुको उपलब्धता बढ्ने र विद्यार्थीको सिकाई स्तर बढाउने सकिने शिक्षा विभागका निर्देशक लवदेव अवस्थीले बताए ।
‘अब राम्रा शिक्षकले पढाउने अवसर पाउनेछन् । यसले तत्कालको आवश्यकता पूरा गर्ने मात्र होइन, दिर्घकालीन रुपले पनि शिक्षाको विकासमा योगदान पुग्दछ,’ अवस्थीले बताए । सरकारले शिक्षक अनुमति बिनानै शिक्षण सेवामा प्रवेश गर्ने शिक्षकको पेशागत विकासका लागि तीन चरणमा एक महिने अनिवार्य शिक्षण तालिमको व्यवस्था गर्ने बताइएको छ ।