ओखलढुंगा, माघ १४ -
वरुणेश्वर ७ स्थित मिलन चौतारा प्राविमा सोमबार ४ जनामात्र विद्यार्थी अध्ययनरत थिए। उक्त विद्यालयमा बाल कक्षासहित कक्षा ३ सम्म अध्यापन हुन्छ। विद्यालयकी सुमित्रा राई सोमबार कक्षा ३ मा एक जना छात्रालाई पढाउँदै थिइन्। 'तीन कक्षामा तीनै जना विद्यार्थी छन्। आज दुई जना आएनन्,' राईले भनिन्, 'त्यसैले एकै जनालाई पढाइरहेकी हुँ।' बाल कक्षासहित कक्षा तीनसम्म पढाइ हुने यहाँ विद्यार्थी संख्या २५ रहेको प्रधानअध्यापक कुलबहादुर बानियाँले दाबी गरे। 'टिफिनपछि नै घरतिर लागेछन्,' प्रअ बानियाँले भने, 'दैनिक १०-१५ जना आउँछन्।'
०४७ मा स्थापना भएको प्राविमा चार वर्षअघि कक्षा ४ सम्म पढाइ हुन्थ्यो। विद्यार्थी संख्या कम भएकै कारण ०६७ मा घटुवा गरी कक्षा तीनमा झारिएको हो। करिब १० मिनेटको दूरीमा रहेको गणेश मावि ढुस्केले दुई वर्षअघिदेखि अंग्रेजी माध्यमबाट पढाउन थालेपछि यहाँ विद्यार्थी संख्या घटेको उनले बताए।
प्रअसहित दुई शिक्षक दरबन्दी रहेको विद्यालयमा एक दरबन्दी हालै रिक्त भएको छ। विद्यालय अनुदानबापत प्राप्त ३० हजार रुपैयाँ सहयोगमा कर्मचारीका रूपमा सुमित्रा २ महिनाअघि नियुक्त भएकी हुन्। उनले पनि शिक्षिकाकै रूपमा पढाउने गर्छिन्। विद्यार्थी उपस्थित न्यून भएपछि कर्मचारीलाई खाली समय बिताउन धौधौ पर्छ। कतै शिक्षक दरबन्दीको संख्याभन्दा विद्यार्थीको चाप बढी भएको गुनासो आइरहँदा यहाँ विद्यार्थीविहीनजस्तै गरी चलेको स्थानीय अभिभावकले बताए। निमित्त जिल्ला शिक्षा अधिकारी शंकरबाबु श्रेष्ठले स्रोत शिक्षकमार्फत विद्यार्थीको संख्या अनुगमनपछि यस्तालाई पुनः गाभ्न सकिने जनाए। दुई वर्षअघिमात्र जिल्लाको दुई दर्जन विद्यालय गाभिए पनि यस्ता दर्जनौं अहिले पनि सञ्चालनमा छन्।