हरिकृष्ण गौतम
सरकारी त्यसमा पनि समुदायको ब्यवस्थापनमा सञ्चालन भइरहेका विद्यालयप्रति अझैपनि हेर्ने दृष्टिकोण निजीभन्दा तल्लो स्तरको छ ।अभिभावकले प्रवेशीका परिक्षासँगै विभिन्न कारणलाई आधार मानेर निजीलाई नै रोज्ने गरेको पाइन्छ । तर म्याग्दीमा सामुदायिक विद्यालयले निजीलाई शिक्षामा टक्कर दिइरहेका छन् ।२०७१ सालको प्रवेशीका परिक्षामा जामुनाखर्क उच्च माविले ४ जना विशिष्ट श्रेणी सहित ४४ जना र बेनी सामुदायिकले सतप्रतिशत उत्र्तिणा गर्न सफल भयो । जामुनाखर्कका प्रत्युस ढ्रङ्गानाले ७१८(८९.७५) ल्याएर जिल्ला दोस्रो तथा सामुदायिक तर्फ धौलागिरि प्रथम र बेनी सामुदायिक अञ्चलमै सतप्रतिशत ल्याउन विद्यालय बने । ‘दुई विद्यालयले नियमित राम्रो नतिजा ल्याइरहेका छन्, गुणस्तरीय शिक्षाका लागि समुदायको सक्रियता पनि राम्रो छ’ जिल्ला शिक्षा अधिकारी दिलिप कुमार ठाकुरले भने । उनले जिल्लाका केही सामुदायिक विद्यालयको अवस्था कमजोर देखिएपनि धेरैले ६० प्रतिशत भन्दा बढि नतिजा ल्याउन सफल भएको बताए ।
विद्यालयको वातावरण, विद्यार्थीको रुचीसँगै समुदायको समेत चासो भएका विद्यालयले नियमित राम्रो नतिजा ल्याउन सफल भएको जिल्ला शिक्षा कार्यालयले जनाएको छ । २०६० साल देखी प्रवेशीका परिक्षामा सहभागिता जनाएको जामुनाखर्क उच्च माविले ९ जनालाई विशिष्ट श्रेणीमा उत्र्तिणा गराएको छ । त्यस्तै २०६३ साल देखी परिक्षामा सहभागि भएको बेनी सामुदायिकले राम्रो अंक सहित प्रथम श्रेणी र सतप्रतिशत नतिजा ल्याइरहेको छ । विद्यार्थीलाई शाररीक तथा मानसिक रुपमै परिक्षामा सामेल हुने वातावरण विद्यालयको कक्षा कोठामै गराउने गरेको जामुनाखर्क उच्च माविका प्रचार्य सोमनाथ ढुंगानाले बेनीअनलाइनलाई बताए । ‘राम्रो नतिजा आउनुमा धेरै पक्ष छन्, सबैको सक्रियतामा नियमित राम्रो नतिजा आइरहेको छ’ उनले भने । प्रत्येकबर्ष राम्रो नतिजा ल्याउन थालेपछि निजी विद्यालयका अभिभावको आर्कषण समेत बढ्न थालेको पाइएको छ ।
निजी विद्यालयले समेत प्रतिस्पर्धीको रुपमा हेरिरहेको अवस्थामा सामुदायिकले नियमित परिक्षा, अभिभावको सहभागितामा उत्तरपुस्तिका परिक्षण, सुझाव, अभिभावको नियमित अनुगमन, विद्यार्थीको कमजोर पक्षको पहिचान लगाएतले समेत परिक्षाको नतिजामा सकारात्मक प्रभाव पारेको बेनी सामुदायिकका प्रचार्य दिपक श्रेष्ठको भनाई छ । ‘विद्यार्थीको कमजोर पक्षलाई केन्द्रित गरेर अगाडी बढ्ने गरेका छौ, नियमित अभ्यास नै सफलताको आधार बनेको छ’ उनले भने । प्रत्येकबर्ष विद्यालयको नतिजा राम्रो आउन थालेपछि निजी विद्यालयबाट समेत धमाधम विद्यार्थी भर्नाका लागि आउने गरेको बताए । यसबर्ष क्षमताभन्दा करिव १ सय ६० प्रतिशत विद्यार्थीले आवेदन दिएपछि परिक्षाबाट छनौट गरी भर्ना गरिएको थियो । प्रयाप्त दरबन्दी, स्रोत र साधनको अभावका बावजुत पनि सामुदायिक विद्यालयको नतिजा ल्याइरहेको भन्दै राज्यले प्रयाप्त जनशक्ती सहितको आवश्यक सुविधा उपलब्ध गराए नतिजालाई अझै राम्रो बनाउन सकिने विद्यालयको भनाई छ ।