"पीडा अस्थायी शिक्षकको "
बिसौं बर्ष पढाएर सेवाबाट बाहिरिदै छु ।
मुटुमा तीर गढ़ाएर सेवाबाट बाहिरिदै छु ।।
डढ़ेलोले सुकाएको जंगलको ठुटो जस्तै ।
आफैलाई डढ़ाएर सेवाबाट बाहिरिदै छु ।।
उर्जाशील जिन्दगानी कर्णधारलाई भनि ।
आज बलि चढाएर सेवाबाट बाहिरिदै छु ।।
आफ्नै चेला आफू भन्दा धेरै माथि पुगे ।
आशाहरु सडाएर सेवाबाट बाहिरिदै छु ।
सुनौलो हात हल्लाउने नीति आयो अरे ।
झनै ब्यथा बढाएर सेवाबाट बाहिरिदै छु ।।
२०७३-०२-१४/८:३३pm
भुकम्प बिशेष
भुकम्पले घर भत्क्यो आफन्तको लास भयो ।
बर्ष दिन बितिसक्यो त्रिपाल मुनि बास भयो ।।
पीडा अझै मेटिदैन झल्को आउँछ घरि घरि ।
हजारौंको मृत्युसँगै धनजन सत्यानास भयो ।।
पीडितलाई राहत दिने भाषण मात्र गरी बस्यौ ।
गोदाममा राहत सड्यो यता आधा गास भयो ।।
धेरै ठूलो सहयोग आयो कता गयो पत्तो छैन ।
आज भोलि हल्ला सुन्छु नेताजीकै पास भयो ।।
कस्लाई पो सुनाऊँ खै पीडितका दुःख ब्यथा ।
भोट हाली पठाएको नेता झन बदमास भयो ।।
२०७३-०१-१२/६:५२am
जलस्रोतको धनी देशमा गाग्री हानाहान भयो ।
लोकतन्त्रको नाम जप्दै कुर्ची तानातान भयो ।।
दश पढयो गाउँ छोड्यो बाह्र पढयो देशै छोड्यो ।
रोजगार खोज्दै बिश्वभरि डुल्ने पहिचान भयो ।।
पछि परे जागिर खाने भन्दै गाउँमा अल्झिनेहरु ।
दुई चार बर्ष बिदेश बस्ने आज नम्बर वान भयो ।।
पढयो लेख्यो काम छैन हात मुख जोर्न माम छैन।
दक्षता र योग्यताको आज यहाँ अपमान भयो ।।
२०७३-०१-१५/९:१७
सन्दर्भ " मई दिबस "
गफ गर्ने गफाडिलाई गफै पिच्छे ताली हुन्छ ।
श्रम गर्ने श्रमिकलाई उल्टै यहाँ गाली हुन्छ ।।
पाऊंदैनन श्रमिकले तोकिएको ज्याला पनि ।
जब शोषक सामन्त नै सत्तामा बहाली हुन्छ ।।
दिनदिनै हजारौं हजार युबाहरु बिदेशिन्छन ।
गाउँ मात्र होइन अब शहर पनि खाली हुन्छ ।।
पाउने छैनन् श्रमिकले खोसिएको अधिकार ।
बिश्वास गरी पठाएको नेता जब जाली हुन्छ ।।
२०७३-०१-१९/८:५४pm
सरकार ढाल्ने खेल फेरि चल्न थालेको छ ।
सहयात्री बनेकैले किन छल्न थालेको छ ।।
बामपन्थी एकताको कुरो गर्थ्यौ कमरेडहरु ।
सात महिनामै गठबन्धन ढल्न थालेको छ ।।
जनबादी सत्ता ल्याउंछौं भनी कुर्लिएथ्यौ । ।
पूँजी बादी सत्ताकै फल फल्न थालेको छ ।।
काम कुरो एकातिर कुम्लो बोकी सत्तातिर ।
तिम्रै कार्यकर्ताको मन जल्न थालेको छ ।।
कहिल्यै कुरो बुझ्ने हैनौ चल्छौ इशारामा ।
राजनीतिमा रातो बत्ती बल्न थालेको छ ।।
२०७३/०१/२२ Wed 11pm
हिजो रातो बत्ती बल्यो आज हरियो ।
नेताज्यूको यूटर्न देख्दा छक्कै परियो ।।
साँझपख एउटा कुरा बिहानीमा अर्कै ।
रात भरि कता गइयो के के गरियो ।।
सौदाबाजी सत्ताकै छ आलोपालो गर्ने ।
जनतालाई आश्वासनकै भ्रम छरियो ।।
भुकम्पले भत्किएको घर बन्ने कहिले ।
फेरि अर्को त्रिपाल मुनि बसाई सरियो ।।
२०७३-०१-२३/८:१८pm
गजल
शिक्षामा पैसाको खेलो भएको छ ।
रातारात कमाउने मेलो भएको छ ।।
कृतिम नतिजाको बिगबिगी बढ्यो ।
गरी खान नसक्ने चेलो भएको छ ।।
लाखौंको भबिष्य क्षणभरमै जल्ने ।
शिक्षा खडेरीको डढ़ेलो भएको छ ।।
नपढ़ेकाहरुको त कुरै नगरौं हजुर ।
पढेकै मान्छे पनि अर्घेलो भएको छ ।।
२०७३-०१-२५/७:२३am
तिमी नभए
मरे तुल्य हुन्छु म तिमी नभए ।
एक्लै बसी रुन्छु म तिमी नभए ।।
तिम्रै याद आई दिन्छ घरिघरी ।
तस्बिरलाई छुन्छु म तिमी नभए ।।
कोहि छैन मनको ब्यथा बुझि दिने ।
आँशुले पीर धुन्छु म तिमी नभए ।।
उर्लिएर आएका रहरहरु लाई ।
मन भित्रै थुन्छु म तिमी नभए ।।
कुरा काट्नेहरु सल्बलाए पछि ।
नराम्रो हल्ला सुन्छु म तिमी नभए ।।
२०७३-०१-२६/६:४०pm
हाम्रो १८ बर्षे सहयात्रा ।
पत्तै नपाई बिते हाम्रा ती अठार बर्ष ।
धेरै दुःख पीडा झेल्यौ थोरै मात्र हर्ष ।।
जिन्दगानी यस्तै रैछ एक्लै हिड़न गार्हो ।
दुई जनाबीच गर्नु पर्ने बिचार र बिमर्श ।।
कुन मोडले कतातिर लैजाने हो कुन्नी ।
हरेक पाइला पाइलामा गर्नु छ संघर्ष ।।
एउटाको मर्मलाई अर्कोले बुझ्न सके ।
सफल हुन्छ सहयात्रा भन्दैछु सहर्ष ।।
२०७३-०१-२९ /८:२९ pm
बाहिर अमृत तर भित्र जहर भेटेको छु ।
जिन्दगीको मोडमा दुखद प्रहर भेटेको छु ।।
जोखिम मोलि धनको पछि दौडिदैछ मान्छे ।
छोटो बाटो धन कमाउने रहर भेटेको छु ।।
छाडिदेउ अस्मिताका कुरा गर्न मेरो सामु ।
जवानीको लिलाम हुने शहर भेटेको छु ।।
बाहिरि रूप एकथरि बास्तबिकता अर्कै ।
आफन्तकै भर नपर्ने ठहर भेटेको छु ।।
२०७३-०२-०६/७:५०am
कहिले हुन्छ अनाबृष्टि कहिले अति बृष्टि ।
सताउनु थियो भने किन प्रभु यस्तो सृष्टि ।।
बाली नाली सबै नष्ट पुर्पुरोमा हात भयो ।
सरकारमा रमाउनेको कहिले पुग्ला दृष्टि ।।
२०७२-०२-०३/६:२८am