हरेक नयाँ बर्ष सँगै ब्यक्तिले केहि नयाँ पनको महशुस गर्नु स्वभाबिक हो । जसरी बर्ष फेरिएको हुन्छ त्यसैगरी ब्यक्तिका चाहना, आबश्यकता र आकांक्षाहरु पनि बदलि रहन्छन । नयाँ बर्षको आगमन सँगै अघिल्लो बर्षका कार्यहरु, उपलब्धिहरु र कमजोरीहरुको समिक्षा गर्दै भाबी योजनाहरुको निर्माण र कार्यान्वयन तर्फ लाग्नु पर्ने हुन्छ ।
शिक्षा क्षेत्रमा कृयाशील शिक्षाकर्मी हुनुको नाताले स्वभाबिक रुपमा मेरा योजनाहरु शिक्षाको सुधार, बिकास र पेसागत उन्नयनमा आधारित हुने गर्दछन् । पहिलो प्राथमिकता शिक्षण पेसाको पेसागत बिकास, जवाफदेहिता, इमान्दारिता र कर्तब्यनिष्ठता नै हो । नयाँ बर्षको आगमन सँगै नयाँ शैक्षिक सत्रको शुरुवात भइसकेको छ । बिद्यार्थी भर्ना अभियानमा सकृय सहभागी भई बिद्यालय बाहिर रहेका बालबालिकाहरुलाई भर्ना गराई उनीहरुको शिक्षाको अधिकार सुनुश्चित गराउनु प्रमुख दायित्व हो । बालबालिकाहरुलाई समयमै पाठ्य पुस्तक उपलब्ध गराउने, आबश्यक परामर्श र सल्लाह प्रदान गर्ने खालका योजनाहरु समेटिनु पर्ने हुन्छ ।
प्रत्येक शिक्षकले शैक्षिक सत्रको शुरुमा आफूले अध्यापन गर्ने बिषयहरुको सबै खाले योजनाहरुको निर्माण गर्ने, शिक्षण सामग्रीहरुको बन्दोबस्त मिलाउने, सन्दर्भ सामग्रीहरुको खोजी तथा संकलन गर्ने, आबश्यक पर्ने बिधि तथा प्रबिधिहरुको उपयोगका लागि पूर्ब तैयारी गर्ने, नियमित रुपमा प्रयोगमा आउने मूल्यांकनका साधनहरुको तैयारी गर्ने जस्ता योजनाहरु निर्माणमा आफूलाई ब्यस्त गराउनु पर्दछ । मेरा योजनाहरु पनि यिनै बिषय बस्तुहरुमा केन्द्रित हुनेछन ।
आफ्नो बिषयसंग सम्बन्धित नबिनतम जानकारीहरु संग परिचित हुने, आफूलाई अध्ययनशील बनाउने, बिद्यार्थीहरुको उपलब्धि बृद्धि को योजना बनाउने, शिक्षण सुधार योजनाहरु निर्माण गर्ने, अतिरिक्त समय ब्यबस्थापनको योजना गर्ने, आबश्यक स्रोत साधनहरुको ब्यबस्थापन गर्ने जस्ता कार्य हरुमा योजनाबद्ध ढंगले लाग्ने ।
यसका अतिरिक्त बिद्यालय सुधार योजना निर्माण र त्यसको कार्यान्वयनमा सकृय रहने, शिक्षासंग सम्बन्धित पुस्तक, लेख रचनाहरू लेखन तथा प्रकाशन गर्ने, शिक्षण सिकाईसंग सम्बन्धित खोज अनुसन्धान गर्ने । समुदाय सचेतिकरण कार्यक्रमहरुमा सहभागी हुने । शिक्षण सिकाईका ज्ञान तथा अनुभबका लागि बिभिन्न शिक्षण संस्था तथा स्थानहरुको अबलोकन भ्रमण गर्ने । बिभिन्न शैक्षिक अन्तर कृयात्मक कार्यक्रमहरुमा बिचार बिनिमय गर्ने जस्ता कार्यहरुमा सरिक हुने नै नयाँ बर्षका योजनाहरु हुन ।