तपाईले आफ्नो जन्म दिन कसरी मनाउनु हुन्छ ? केक काटेर, साथीभाई जम्मा गरी भोज भतेर नाच गान गरेर, मिठाई बाडेर वा अन्य कुनै कार्य गरेर । जन्म दिन मनाउने आआफ्नै तरिकाहरु एवं शैलीहरु हुन्छन् । तर यहाका एक व्यक्तिले आफ्नो जन्म दिन फरक किसिमले मनाउँदै आउनु भएको छ । जिल्लाको मोदी गाउँपालिका वडा नं २ पातीचौर निवासी ६४ बर्षिय समाजसेवी बुद्धि प्रसाद तिवारीले आफ्नो जन्मदिनको अबसर पारेर छ ओटा विद्यालयमा अध्ययन गरेका छ जना उत्कृष्ट बिद्यार्थीहरुलाई पुरस्कार प्रदान गरी जन्म दिन मनाउनु भएको हो । तिवारीले यस बर्ष मात्र नभइ विगत २२ बर्ष देखि यसै गरी आफ्नो जन्म दिन मानाउदै आउनु भएको छ ।
२०५४ सालमा दश हजार राशीको बुद्धि शुभ जन्मोत्सव अक्षयकोष स्थापना गरी त्यसको व्याजबाट गाउको जननेत्र मावि देउपुरबाट हरेक बर्ष एसएलसीमा प्रथम स्थान प्राप्त गर्ने एक जना, पशुपति निमावि र आदर्श प्राविबाट सर्वोत्कृष्ट हुने एक एक जना गरी तीन जना बिद्यार्थीलाई क्रमशः एक एक हजार रुपैया पुरस्कार प्रदान गर्ने गरिएकोमा केही बर्ष पहिले देखि नमुना आवासीय मावि र देउपुर नमूना आवासीय माविका सर्वोत्कृष्ट बिद्यार्थीलाई पनि पुरस्कृत गर्न थालिएको थियो । यसवर्ष देखि अक्षय कोष समेत बढाएर ५० हजार पुरयाइएको र जनआदर्श अंगे्रजी आवासीय विद्यालय थप गरी छ ओटा विद्यालयका छ जना सर्वोत्कृष्ट बिद्यार्थीहरुलाई पुरस्कृत गरिएको संस्थापक तिवारीले जानकारी दिनुभयो ।
कार्यक्रममा जननेत्र माविका विशाल राज शर्मा, नमूना आवासीय माविका सौगात लामिछाने, देउपुर नमूना आवासीय माविका रिया केसी, पशुपति आविका सफल परियार, आदर्श आविका गरिमा चापागाई, र जनआदर्श अंग्रेजी आविका रेजन मल्ललाई जनही रु एक हजार नगद र प्रमाणपत्र प्रदान गरी पुरस्कृत गरिएको थियो । सो अवसरमा बोल्दै मोदी गाउँपालिका वडा नं २ का वडाध्यक्ष विकास तिमिल्सिनाले समाज सेवाको क्षेत्रमा तिवारीले पुर्याएको योगदानको चर्चा गर्नु भएको थियो । त्यस्तै रोटरी क्लब अफ पर्वतका पूर्व अध्यक्ष प्रेम प्रसाद पौडेलले शुभकामना मन्तव्य व्यक्त गर्नुभएको थियो । अक्षय कोष संचालक समितिका अध्यक्ष नारायण प्रसाद चापागाई सो सभापतित्वमा भएको सो कार्यक्रमको संचालन पशुपति आधारभूत विद्यालयका प्रअ तारापति तिमिल्सिनाले गर्नु भएको थियो ।
