३० फागुन, काठमाडौं । भोलिदेखि शुरु हुने एसएलसी परीक्षाको सबै तयारी पूरा भएको परीक्षा नियन्त्रण कार्यालयले जनाएको छ । चैत ९ गतेसम्म सञ्चालन हुने एसएलसी परीक्षा बिहान ८ बजेदेखि ११ बजेसम्म हुनेछ । प्रयोगात्मक परीक्षा सैद्धान्तिक परीक्षा सकिएपछि जिल्ला शिक्षा कार्यालयको व्यवस्थापनमा सञ्चालन हुने कार्यालयले जनाएको छ ।
झण्डै साढे ५ लाख सहभागी हुने
यसवर्षको एलएलसी परीक्षामा ५ लाख ४७ हजार एकसय ६५ परीक्षार्थी सहभागी हुँदैछन् । यसमध्ये नियमिततर्फ नियमितर्फ ४ ला ३० हजार ९७ र एक्जेम्टेडतर्फ १ लाख १७ हजार ६८ छन् ।
परीक्षाका लागि १ हजार ७ सय ८६ परीक्षा केन्द्र निर्धारण गरिएको छ । परीक्षा सञ्चालनका लागि १ हजार ७ सय ८६ केन्द्राध्यक्ष, २ हजार ६ सय ५५ सहायक केन्द्राध्यक्ष, २१ हृजार ८ सय ९० निरीक्षक, ७ हजार २ सय ९७ सहयोगी र १९ हजार ८ सय ६० सुरक्षाकर्मी परिचालन हुने कार्यालयले जनाएको छ ।
परीक्षामा कडाइ
एसएलसी परीक्षालाई मर्यादित बनाउन नियममा कडाई गरिएको परीक्षा नियन्त्रण कार्यालयले जनाएको छ । प्रश्नपत्रको गोपनीयता भङ्ग गरेमा, परीक्षा केन्द्रमा सम्बन्धित पदाधिकारीको स्विकृतिविना प्रवेश गरेमा, प्रयत्न गरेमा वा परीक्षा केन्द्र नियन्त्रणमा लिई अमर्यादित कार्य गरेमा, अरूको तर्फबाट परीक्षा दिएमा र परीक्षाको मर्यादा भङ्ग हुने कुनै कार्य गरेमा त्यस्ता व्यक्तिलाई कसुरको मात्रा हेरी १ लाखसम्म जरिवाना वा ६ महिना कैद वा दुवै सजाय हुने व्यवस्था गरिएको छ ।
यस्तै कुनै परीक्षा केन्द्रमा अनियमित कार्य भएमा परीक्षा बदर गर्ने वा पुनः परीक्षा गराउने सम्मको कार्वाही हुने कार्यालयको भनाई छ ।
परीक्षामा कुनै परीक्षार्थीले कुनै किसिमको अनियमित वा अनुशासनहीन कार्य गरेमा कुनै विषयको मात्र वा पूरै परीक्षा रद्द गरी बढीमा अर्को १ वर्षसम्म आगामी परीक्षामा सम्मिलित हुन नपाउने गरी कारवाहीका गर्न सक्ने व्यवस्था छ ।
बन्द नगर्न अपील
एसएलसी परीक्षा अवधिभर बन्द, हडताल लगायतका कार्यक्रम नगर्न परीक्षा नियन्त्रण कार्यालयले सम्बन्धित सबै पक्षसित आग्रह गरेको छ । ‘परीक्षालाई मर्यादित, अनुशासित र व्यवस्थित तथा परीक्षार्थी शान्तिपूर्ण र भयरहित अवस्थामा परीक्षामा सहभागी हुनका लागि सहयोग गर्न सबैसित अपील गरिएको छ’ परीक्षा नियन्त्रक खबराज बरालले भन्नुभयो -’एसएलसी परीक्षा आम सरोकारको विषय भएकाले परीक्षा सञ्चालनदेखि नतिजा प्रकाशनसम्म सकारात्मक सहयोगको अपेक्षा गरिएको छ ।’