काठमाडौं, श्रावण ११
उच्च माध्यमिक शिक्षा परिषद्ले ११ र १२ कक्षामा छात्रवृत्ति कोटामा अध्ययनरत विद्यार्थीसँग पनि शुल्क लिन निजी कलेजलाई अनुमति दिएको छ । निजी कलेजले छात्रवृत्तिका विद्यार्थीसँग चर्काे शुल्क असुल गरिरहेको गुनासो आइरहेका बेला परिषद् स्वयंले शुल्क लिन अनुमति दिएको हो । छात्रवृत्तिको शुल्कको विरोधमा उत्रिएको अखिल क्रान्तिकारी र परिषद् पदाधिकारीबीच बिहीबार भएको बैठकमा यस्तो सहमति बनेको हो ।
सहमतिअनुसार विज्ञान विषयमा मासिक १ हजार, व्यवस्थापनमा ६ सय ५० र मानविकीमा ३ सय ५० रुपैयाँ शुल्क लिन पाउनेछन् । प्रयोगशाला र परीक्षा शीर्षकमा शुल्क लिन पाउने सहमति भएको हो । छात्रवृत्तिका विद्यार्थीसँग निजी कलेजले १० देखि ४० हजार रुपैयाँसम्म असुल गरेको भन्दै अखिल क्रान्तिकारी त्यसको विरोधमा उत्रिएको थियो । तर, अखिल क्रान्तिकारी स्वयंले शुल्क लिन पाउने व्यवस्थामा सहमति गरेपछि विद्यार्थीहरू पीडित बनेका छन् । उच्च माध्यमिक विद्यालय सञ्चालकको संस्था हिसानले छात्रवृत्ति कोटाका मानविकीका विद्यार्थीसँग १० हजार, व्यवस्थापनसँग १५ हजार र विज्ञान संकायका विद्यार्थीसँग २५ हजार रुपैयाँ लिने निर्णय गरेको थियो । परिषद्, हिसान, अभिभावक संघ र अनेरास्ववियु (क्रान्तिकारी) बीच बुधबार सहमति भएको थियो । छात्रवृत्ति कोटामा पढ्न गएका विद्यार्थीसँग १० हजार मानविकी, १५ हजार व्यवस्थापन र २५ हजार विज्ञान संकायमा लिने निर्णय हिसानले गरेको थियो ।
हिसानका उपाध्यक्ष डा.बाबुराम पोखरेलले परिषद्ले गरेको निर्णयलाई मुलुकभरका निजी कलेजले कार्यान्वयन गर्ने बताए । ‘सरकारको निर्देशन हामीले मान्नैपर्छ, यसका आधारमा दस जोड दुईको शुल्क निर्धारणका लागि आधार पनि तयार भएको छ,’ उपाध्यक्ष पोखरेलले राजधानीसँग भने । परिषद्का सहसचिव नारायण कोइरालाले चालू शैक्षिक सत्रका लागि प्रयोगशाला र परीक्षा शुल्कबापत छात्रवृत्तिमा पढ्न गएकासँग कलेजले शुल्क लिनसक्ने बताए । परिषद्ले तयार पारेको निर्देशिकामा भर्ना, मासिक, वार्षिक आदि शुल्क लिन नपाउने उल्लेख छ । अखिल क्रान्तिकारीका उपत्यका नेवाः राज्य समितिका संयोजक सुरेन्द्र बस्नेतले आफूहरूले छात्रवृत्तिमा पढ्ने विद्यार्थीसँग कलेजले शुल्क लिन नपाउने मुद्दा अगाडि ल्याएको भए पनि चालू शैक्षिक सत्रका लागि पूर्णरूपमा कार्यान्वयन गर्न नसकेको बताए । सरोकारवाला निकाय र परिषद्को आग्रहमा न्यूनतम शुल्क कायम गरेको बताउँदै संयोजक बस्नेतले राजधानीसँग भने, ‘परिषद्ले आफैंले छात्रवृत्तिमा पढ्न पठाएका विद्यार्थीसँग शुल्क तोकेर नियम र निर्देशिकालाई अपव्याख्या गरेको छ ।’
उच्च माध्यमिक शिक्षा परिषद्ले ११ कक्षामा छात्रवृत्तिमा पढ्नका लागि २ हजार ४ सय ३७ जनाको नाम सार्वजनिक गरेको थियो । सरकारी विद्यालयमा पढ्ने र अतिगरिब विद्यार्थीलाई छात्रवृत्ति उपलब्ध गराइन्छ । निजी कलेजले कुल विद्यार्थी संख्याका ३ प्रतिशतलाई सरकारी कोटामा र २ प्रतिशतलाई कलेज आफैंले छात्रवृत्ति उपलब्ध गराउनुपर्ने परिषद्ले व्यवस्था गरेको छ । तर, छात्रवृत्ति कोटामा पढ्न गएका विद्यार्थीसँग कलेजले प्रयोगशाला, परीक्षा शुल्कलगायतका विषयमा भन्दै शुल्क लिने गरेको छ ।