पर्वत, १४ कार्तिक
क्षेत्रीय शिक्षा निर्देशनालय पोखराका निर्देशक विष्णु बहादुर द्धारेले विद्यालय प्रति समुदायको सकारात्मक सोंचको विकास गर्न सके मात्र शिक्षा क्षेत्रको विकास गर्न सकिने विचार व्यक्त गर्नु भएको छ । जिल्लाको सदरमुकामस्थित नमुना आवासीय उच्च माविको साताव्यापी रजत महोत्सवको अवसरमा बिहीबार आयोजित समापन मुल समारोहको प्रमुख अतिथिको रुपमा बोल्दै द्धारेले सो कुरा बताउनु भएको हो ।
सोही कार्यक्रममा बोल्दै निर्देशक द्धारेले विद्यालयको प्रगतिका लागि असल प्रशासक, कुशल व्यवस्थापक र कर्तव्यनिष्ठ शिक्षकको आवश्यकतामा जोड दिनु भयो । पच्चिस बर्षको अवधिमा शैक्षिक गुणस्तर अभिबृद्धिका लागि विद्यालयले धेरै नयाँ अभ्यासहरुको थालनी गरेकोमा प्रशंसा गर्दै अन्य विद्यालयहरुले पनि यस्ता अभ्यासहरुको सिको गर्नु पर्ने कुरा बताउनु भयो ।
सोही कार्यक्रममा बोल्दै जिल्ला शिक्षा अधिकारी घनश्याम पौडेलले शिक्षक विद्यार्थीहरुको मनोबल उच्च राख्न सके मात्र अपेक्षित शैक्षिक उपलब्धि हासिल गर्न सकिने बताउनु भयो । जिशिअ पौडेलले बिद्यार्थीहरुमा व्यवहारिक ज्ञान, सीप र अनुभवहरु प्रदान गर्न सफल भएकोमा विद्यालयलाई बधाइ दिंदै सकारात्मक कार्यहरुको सबै विद्यालयहरुले आत्मसात गर्न जरुरि रहेको विचार व्यक्त गर्नु भयो ।
कार्यक्रममा क्षेशिनि पोखराका उपसचिव योगेन्द्र पराजुली, विद्यालयका संस्थापकद्धय तेज बहादुर लामिछाने र खेम बहादुर लामिछाने, अभिभावक अम्बिका लोहनी लगायतले शुभकामना मन्तव्य व्यक्त गर्नु भएको थियो । विद्यालयका प्राचार्य यम प्रसाद शर्माले विद्यालयको समग्र गतिविधिको जानकारी गराउनुका साथै प्रगति विवरण प्रस्तुत गर्नु भएको थियो ।
सोही कार्यक्रममा प्रमुख अतिथिबाट विद्यालय हातामा निर्माण गरिएको रजत जयन्ती स्मारकको अनावरण गरिनुका साथै रजत जयन्ती स्मारिका दिपज्योतिको विमोचन समेत गरिएको थियो ।
रजत जयन्तीकै अवसरमा विद्यालयले मितरी तथा भगिनी विद्यालयहरु पञ्चकोशी प्रावि चित्रे, आदर्श प्रावि देउपुर, ज्ञानेन्द्र प्रावि तिलाहारलाई शैक्षिक छात्रवृत्ती कोषका लागि प्रति विद्यालय पच्चिस हजार नगद चेक र बिद्यार्थीका लागि विभिन्न शैक्षिक सामाग्री हस्तान्तरण गरेको थियो । सोही अवसरमा जिल्ला ट्राफिक प्रहरी कार्यालय र नगर प्रहरी कार्यालयलाई संयुक्त रुपमा पच्चिस हजार नगद र युरो गार्ड प्रदान गरिएको थियो । साथै मोदीबेनीमा रहेको बृद्धाश्रममा रहेका सत्र जना बृद्धबृद्धाका लागि सहयोगस्वरुप भौतिक सामग्रीहरु वितरण गरिएको थियो ।
सो समापन समारोहमा भूपु बिद्यार्थीहरु, भूपु शिक्षकहरु, अभिभावकहरु, विद्यालयमा कार्यरत शिक्षकहरु, शिक्षा क्षेत्रमा उल्लेखनीय योगदान पुर्याउने महानुभावहरु, साताव्यापी विभिन्न कार्यक्रमहरुमा उत्कृष्ट हुने विद्यालय तथा विद्यार्थीहरु, खेलाडीहरु लगायत विद्यालयलाई सहयोग गर्ने विभिन्न संघसंस्थाहरुलाई समेत सम्मानित तथा पुरस्कृत गरिएको थियो ।
कार्यक्रमको बीचमा सदरमुकामस्थित विभिन्न विद्यालयका विद्यार्थीहरुले सांस्कृतिक कार्यक्रमहरु प्रस्तुत गरेका थिए भने विज्ञान समूहले एन सेवेन्टी नामक रोवोट प्रदर्शन गरेको थियो ।
विद्यालय व्यवस्थापन समितिका अध्यक्ष इन्द्रमान खत्रीको अध्यक्षतामा सम्पन्न कार्यक्रमको संचालन भाइस प्रिन्सिपल खेमराज शर्माले गर्नु भएको थियो ।