गौशाला, फागुन १२ गते । सम्पत्ति विवरण नबुझाएको भन्दै अख्तियार दुरुपयोग अनुसन्धान आयोगले महोत्तरी जिल्लाको ६०४ जना शिक्षकलाई पनि कारबाही गरेको छ ।
आयोगले पत्र लेखी जिल्लाका ६०४ जना शिक्षकलाई जरिवानासहित एक महिनाभित्र विवरण बुझाउन निर्देशन दिएको छ ।
भ्रष्टाचार निवारण ऐन, २०५९ दफा ५० तथा अख्तियार दुरुपयोग अनुसन्धान आयोग ऐन, २०४८ को दफा ३१ (क) मा भएको व्यवस्था बमोजिम तोकिएको अवधिमा सम्पत्ति विवरण नबुझाउने जिल्लाका सयौँ शिक्षक जरिवानामा परेको जिल्ला शिक्षा कार्यालय महोत्तरीले जनाएको छ ।
आर्थिक वर्ष २०६९÷७० को सम्पत्ति विवरण नबुझाउने सार्वजनिक पदधारण गर्ने महोत्तरीका ६०४ जना शिक्षकलाई आयोगले रु पाँच हजारसम्म जरिवाना लिन निर्देशन गरेको छ । शिक्षा मन्त्रालयमार्फत जिल्ला शिक्षा कार्यालयलाई आयोगको २०७० पुस १४ गतेको निर्णयअनुसार जनही रु पाँच हजार जरिवानासहित ३० दिनभित्र सम्पत्ति विवरण बुझाउन भनिएको छ ।
सम्पत्ति विवरण भरेर पठाएकामध्ये पनि कतिपयको नाम विवरण नभर्नेमा परेको पीडित शिक्षकहरूले बताएका छन् । विवरण भर्ने विद्यालय तथा जिल्ला शिक्षा कार्यालयमा समेत त्यसको प्रतिलिपि छैन । त्यो विवरण गोप्य राखी स्वयम् व्यक्तिले भरेर पठाउनुपर्ने कानुनी प्रावधान भएकाले आफूहरूले सोही बमोजिम पठाएको शिक्षकहरू बताउँछन् ।
आयोगले २०७० पुस १९ मा पत्र लेखी सम्बन्धित शिक्षकलाई जरिवाना गरी गराई आयोगलाई जानकारी गराउनसमेत भनेको छ । देशभर सम्पत्ति विवरण नबुझाउने शिक्षकको सङ्ख्या २२ हजार ४३० रहेको आयोगले जनाएको छ । रासस