काठमाडौँ, चैत १७ गते । शिक्षा मन्त्रालयका सचिव सोमलाल सुवेदीले शिक्षा क्षेत्रमा काम गर्नेको भन्दा उपदेश दिनेहरुको भीड भएको गुनासो गर्नुभएको छ ।
नेपाल राष्ट्रिय अभिभावक सङ्घको राष्ट्रिय भेला तथा वार्षिक साधारणसभाको आज यहाँ उद्घाटन गर्दै सचिव सुवेदीले शिक्षामा लगानीअनुसारको प्रतिफल आउन नसकेको उदाहरणका लागि विदेसिएका युवाको आँकडा र अवस्था हेर्दा स्पष्ट हुने बताउनुभयो ।
उहाँले विद्यालयहरुमा जाने स्रोतको सदुपयोगबारे अनुगमन र अभिभावक सचेतनाका कार्य गर्न अग्रसर भएमा अभिभावक सङ्घहरुसँग सरकारले आर्थिक सहकार्य गर्ने प्रतिबद्धता व्यक्त गर्नुभयो ।
शिक्षा विभागका निर्देशक टेकनारायण पाण्डेले निजी विद्यालयका सञ्चालक संस्थाहरुसँग मिलेर तयार गरिएको संस्थागत विद्यालय निर्देशिका कार्यान्वयन गरेरै छाड्ने अठोट व्यक्त गर्दै यसमा आगामी दिनमा संशोधन गर्दा अभिभावक र विद्यार्थीका आवाजलाई पनि सम्बोधन गर्ने बताउनुभयो ।
निजी तथा आवासीय विद्यालय अर्गनाइजेसन (प्याब्सन)का सचिव कुमार घिमिरेले सो निर्देशिकाका केही विषय कार्यान्वयनमा जाँदा समस्या हुने भएकाले सुधारका लागि आग्रह गरिएको बताउनुभयो ।
उच्चमाध्यामिक विद्यालय सङ्घ (हिसान)का अध्यक्ष उमेश श्रेष्ठले निजी क्षेत्रले शिक्षामा योगदान गर्नुका साथै र नवीन आयाम ल्याएकाले यसलाई आलोचनाका दृष्टिले मात्रै नहेर्न आग्रह गर्नुभयो ।
अध्यक्ष श्रेष्ठले अभिभावक सङ्घको कार्यालय स्थापनाका लागि हिसानका तर्फबाट ५० हजार रुपैयाँ सहयोग गर्ने घोषणा पनि गर्नुभयो ।
अखिल नेपाल शिक्षक सङ्गठनका सम्मेलन आयोजक समितिका संयोजक तुल्सीप्रसाद घिमिरेले शैक्षिक सुधारका लागि शिक्षक संस्थाहरुबीच एकीकृत आन्दोलनको आवश्यकतामा जोड दिनुभयो ।
नेपाल राष्ट्रिय शिक्षक सङ्गठनका अध्यक्ष बाबुराम अधिकारीले अभिभावक सङ्घहरुमा शिक्षकहरु बस्ने प्रवृत्तिको अन्त्य गर्न सुझाव दिनुभयो । रासस