काठमाडौँ, चैत १८ गते । नेपाल राष्ट्रिय अभिभावक सङ्घको राष्ट्रिय भेलाले संस्थागत विद्यालय मापदण्ड निर्देशिका २०६९ को कार्यान्वयनमा देखिएको समस्या समाधानका लागि सम्बद्ध पक्षसँग वार्ता गर्नुपर्नेलगायतका १० बुँदे प्रस्ताव पारित गरेको छ ।
भेलाले सरोकारवला सबै निकायको सहयोग र संलग्नतामा तयार पारिएको सो निर्देशिकाबारे केही विवाद देखिएकाले यसको समाधानार्थ सम्बद्ध पक्षसँग वार्ता गरी सहमतिका साथ कार्यान्वयन गरियोस् भन्ने प्रस्ताव पारित गरेको सङ्घका अध्यक्ष धर्मदत्त देवकोटाले जानकारी दिनुभयो ।
निजी तथा आवासीय विद्यालय अर्गनाइजेसन (प्याब्सन) ले सो निर्देशिका अवज्ञा गर्ने चेतावनी दिएको थियो । निर्देशिकाको कार्यान्वयनको माग गर्दै सुप्रभात भण्डारीको नेतृत्वमा रहेको अभिभावक सङ्घ नेपालले प्याब्सनको केन्द्रीय कार्यालयमा गत दुई सातादेखि कालो झन्डा प्रदर्शन गरिरहेको छ ।
सङ्घका अन्य प्रस्तावहरूमा जिल्ला शिक्षा समितिमा आफ्नो स्पष्ट प्रतिनिधित्व हुनेगरी ऐन नियममा व्यवस्था हुनुपर्ने, विद्यालय शान्ति क्षेत्र कार्यान्वयनमा आउने वातावरण तयार हुनुपर्ने, मुलुकभरका सामुदायिक विद्यालयको अपेक्षित शैक्षिक गुणस्तर वृद्धि गरिनुपर्ने, सामुदायिक विद्यालयमा कक्षा १ देखि १० सम्मका पाठ्यपुस्तक निःशुल्क र समयमै उपलब्ध हुनुपर्नेलगायत छन् ।
सङ्घले साक्षरता अभियान सफल बनाउन आफूहरूले घर छिमेकबाटै पहल गर्ने प्रतिबद्धता पनि व्यक्त गरेको छ ।
भेलाको उद्घाटन शनिबार शिक्षा मन्त्रालयका सचिव सोमलाल सुवेदीले गर्नुभएको थियो । रासस