३१ चैत, चितवन । बिहे खर्च जोगाएर चितवनका एक दम्पत्तीबाट स्थापित शिक्षा कोषबाट यसबर्ष ४७ जना विद्यार्थीलाई छात्रबृत्ति प्रदान गरिएको छ ।
चितवन शुक्रनगरका दिपेन्द्र सुवेदी र उनकी धर्मपत्नी गीताद्वारा स्थापित ‘दिपेन्द्र गीता शिक्षा कोष’बाट चितवन भरतपुर नगरपालिका र शुक्रनगर गाविसका ४७ जना विद्यार्थीलाई छात्रवृत्ति प्रदान गरिएको हो । चितवन शुक्रनगर- ३ का दिपेन्द्र र भरतपुर- ६, आनन्दपुरकी गीताको २०६७ असोज २४ गते मागी विहे भएको थियो । यो जोडीले भड्किलो बिहे गर्नुको सट्टा बिहे खर्चबापतको रकम र आफन्त तथा शुभेच्छुकबाट प्राप्त चार लाख रुपैंयाको उपहारलाई कोषको रुपमा परिणत गरेका थिए ।
अहिले कोषको रकम छ लाख रुपैंया पुगेको छ । जसबाट बर्सेनी चितवनको शुक्रनगर र आनन्दपुर आसपासका सरकारी विद्यालयमा अध्ययनरत गरिब तथा जेहेन्दार विद्यार्थीलाई छात्रवृत्तिबापत शैक्षिक सामाग्री, पोशाक, विद्यालय शुल्क लगायत दुई बर्षदेखि प्रदान गरिंदै आएको छ । गतबर्ष कोषबाट ३८ जना विद्यार्थीलाई छात्रवृत्ति प्रदान गरिएको थियो । कोषलाई व्यवस्थित रुपमा संचालन तथा विद्यार्थी छनौट र छात्रवृत्ति वितरणका लागि दिपेन्द्रका पिता शिवराज सुवेदीको संरक्षकत्वमा पाँच सदस्यीय समिति क्रियाशिल छ ।
शिक्षा तथा रोजगारीका सिलसिलामा हाल दिपेन्द्र र गीता जर्मनीमा बस्दै आएका छन । कोषको कार्यलाई व्यवस्थित गर्न एक महिना अघि नेपाल आइपुगेका दिपेन्द्र सुवेदीले विद्यालय शिक्षाको पहुँचबाहिर रहेका बालबालिकालाई विद्यालय शिक्षाको सुविधा प्रदान गर्नु शिक्षा कोषको प्रमुख उद्देश्य रहेको बताउनुभयो । आगामी बर्षमा कोषको राशी बढाउँदै थप बालबालिकालाई छात्रबृत्ति तथा सहयोग प्रदान गर्ने उद्देश्य रहेको उहाँले बताउनुभयो ।