बागलुङ, वैशाख १ । बागलुङको दर्लिङस्थित एक विद्यालयका विद्यार्थीहरुले विद्यालयलाई ११ हजार बराबरको दराज उपहार दिएका छन् । वडा नं २ बल्घासमा रहेको जनता निमाविमा अध्ययनरत कक्षा ८ का विद्यार्थीहरुले निमावि तह पूरा गरी विदाई भएर जानेक्रममा विद्यालयलाई उक्त दराज उपहार स्वरुप दिएका हुन् ।
कक्षा ७ का विद्यार्थीहरुले आयोजना गरेको कार्यक्रम विद्यालय व्यवस्थापन समितिका अध्यक्ष मानबहादुर केसीको अध्यक्षतामा भएको थियो ।
साथै सोही अबसरमा वडा नं २ निबासी चुराबहादुर परियारले १० हजार एक सय र सोही ठाउँ निबासी समाजसेवी तथा विद्यालयका लेखा समितिका संयोजक रणबहादुर रायमाझिले ५ हजार रुपैयाँ विद्यालयलाई सहयोग गरेका छन् । कार्यक्रम विद्यालयका प्रअ वीरेन्द्रप्रताप केसीको सञ्चालनमा सम्पन्न भएको थियो ।