२ बैशाख, काठमाण्डौं ।
शिक्षकका साझा संस्था नेपाल शिक्षक युनियनमा नौ महिनादेखि केन्द्रीय समिति बैठक बस्न सकेको छैन । भ्रष्टाचारको दलदलमा युनियन फसेपछि केन्द्रीय कमिटी बैठक बस्न नसकेको हो । युनियनको संगठनिक गतिविधि अघि बढाउन बैठक आह्वान गर्न केन्द्रीय समितिका अधिकांश सदस्यले पदाधिकारीलाई चर्को दबाब दि“दै आएका छन् । तर, नेतृत्वले आङ्खनो कमजोरी ढाकछोप गर्न बैठक आह्वान नगरेकाले गतिविधि केन्द्रीय र जिल्ला तहमा अघि बढ्न नसकेको दाबी गरिएको छ । युनियनमा भएको भ्रष्टाचारका कारण वर्तमान पदाधिकारीसमेत तीन ध्रुवमा विभाजित भएका छन् ।
एक पक्षले तत्काल बैठक आह्वान गर्नुपर्ने बताएका छन् । अर्को पक्षले अनियमिताको पूर्णरूपमा ढाकछोप गरेपछि मात्र बैठक आह्वान गर्ने बताउँदै आएका छन् । तर, मध्यस्थता गर्दै आएका युनियन सदस्यले भने तत्काल बैठक आह्वान गरेर समस्या समधान गर्नुपर्ने भन्दै नेतृत्वलाई दबाब दि“दै आएका छन् । युनियनको तेस्रो महाधिवेशन चैत अन्तिम साता सकिसक्नुपर्ने थियो । तर, युनियनमा भएको भ्रष्टाचारका कारण अधिवेशनका लागि प्रक्रियासमेत अघि बढ्न सकेको छैन ।
युनियन महासचिव झकबहादुर डाँगीले नौ महिनासम्म केन्द्रीय समिति बैठक बस्न नसकेकाले संगठनका कार्यक्रम तथा जिल्ला गतिविधि अघि बढ्न नसकेको बताए । ‘बैठक आह्वान गर्ने विषयमा अध्यक्ष दिलबहादुर जोशीसँग समन्वयन गर्दै आएका छौं,’ उनले भने । नेतृत्वमा बस्नेबाटै युनियनमा साढे ७ लाख रुपैयाँभन्दा बढी रकम अनियमितता भएको छानबिन समितिले ठहर गर्दै प्रतिवेदन तयार पारिसकेको छ । समिति संयोजक राजेन्द्र अधिकारीले एउटै शीर्षकमा दुई पटकसम्म रकम झिकेर अनियमितता नेतृत्वले गरेको आरोप लगाए । आर्थिक अनियमितता गर्नेमा युनियन अध्यक्ष जोशीले ३ लाख ५० हजार र अन्य पदाधिकारीले कम्प्युटर तालिम, अंग्रेजी भाषालगायतका शीर्षकमा अनियमितता गरेको समितिले जनाएको छ ।
केही समयअघि युनियनभित्र १७ लाख रुपैयाँ आर्थिक अनियमितता भएको आरोप लागेपछि छानबिन प्रक्रिया अगाडि बढेको थियो । समितिले अनियमितता गर्नेको नाम दि“दा कारबाही गर्न सजिलो हुने युनियनले जनाएको छ । आर्थिक समस्याका कारण युनियनको केन्द्रीय समिति बैठक आह्वान गर्न नसकिएको जोशी बताउ“छन् । ‘देशका विभिन्न जिल्लाबाट केन्द्रीय पदाधिकारी आउने भएकाले एउटा बैठकमा २ देखि ३ लाख रुपैयाँ खर्च हुने भएकाले तत्काल बोलाउन समस्या आएको हो,’ उनले भने । महासचिव डाँगीले भने बैठकका लागि आर्थिक समस्या नभएको दाबी गरे ।
युनियनमा भएको आर्थिक अनियमितताका कारण नै बैठक बस्न नसकेको बताउँदै उनले राजधानीसँग भने, ‘छानबिन समितिले दिएको प्रतिवेदनका आधारमा आर्थिक अनियमितता गर्नेमाथि कारबाही प्रक्रिया अघि बढाउन पनि बैठक आवश्यक छ । बैठक वैशाख दोस्रो सातासम्म बस्नेछ ।’ केन्द्रीय समिति बैठक बस्न नसकेका कारण विभिन्न जिल्लामा भएको जिल्ला अधिवेशनमा समेत केन्द्रीयस्तरबाट प्रतिनिधि चयन गर्न सकिएको छैन । नेपाली शिक्षकको छाता संगठन युनियनमा १ लाख ५० हजारभन्दा बढी शिक्षक आबद्ध छन् । तर, शिक्षकका पेसागत छाता संगठनभित्रका नेतृत्वले नै आर्थिक अनियमितता गरेपछि शिक्षकका माग ओझेलमा पर्ने भएका छन् ।