पर्वत, १२ असार । सँगै जीउने र मर्ने वाचा गरेका पतिले छाडेपछि अन्तरजातीय विवाह गरेकी एक दलित युवती अलपत्र परेकी छन् । ब्राह्मण युवकसँग तीन साता पहिले बिहे गरेकी अनिता बिकलाई पतिले छाडेर बेपत्ता भएपछि अलपत्र भएकी हुन् ।
चित्रे गाविस–५ की अनिताले तिलहार गाविस–६ डिमुवाबजार निवासी रामचन्द्र सुवेदीसँग जेठ २४ मा विवाह गरेकी थिइन् । विवाहको तीन दिनपछि श्रीमान्ले आफूलाई छाडेर अलपत्र पारेको भन्दै अनिताले दलित वर्ग उत्थान समन्वय समिति र दलित साझा मञ्चमा न्यायका लागि निवेदन दिएकी छिन् ।
मंसिरदेखि बसेको प्रेमलाई जेठ २४ गते विवाहबाट वैधानिकता दिएपछि बाजुङ्गमा डेरा गरेर दुबैजना सँगै बस्दै आएको अनिताले बताएकी छिन् । तर श्रीमान्लाई उनका आफन्तले झुक्याएर घर लगेपछि भगाएर बेपत्ता बनाएको उनको आरोप छ । बाबु (ससुरा) घरको छतबाट खसेर बेहोस बनेको भनेर जेठ २७ गते घर लगेर आफूहरुलाई छुट्टाएको उनले निवेदनमा उल्लेख गरेकी छिन् । सुवेदी बाजुङ्गको एक निजी विद्यालयका शिक्षकसमेत हुन् । पीडित युवतीले प्रहरीमा दिएको निवेदनको समेत बेवास्ता गरी आफूलाई अन्याय गरिएको बताएकी छिन् ।
यसैबीच दलित वर्ग उत्थान समन्वय समितिका उपाध्यक्ष गमबहादुर बिक र दलित साझा मञ्चका अध्यक्ष यामबहादुर बिकले मङ्गलबार संयुक्त विज्ञप्ति जारी गर्दै महिला अस्मितालाई खेलौनाको रुपमा लिने तथा दलित युवतीलाई भोग गरेर छाड्ने काम अक्षम्य कुकृत्य भएको बताएका छन् ।
विज्ञप्तिमा पीडित दलित युवतीलाई न्याय दिलाउन सहयोग गर्न सबै निकायसँग आग्रह गरिएको छ ।