सन्तोष गौतम, म्याग्दी २०७० साउन ११ । असल छिमेकी नेपालद्धारा सञ्चालित म्याग्दी सामुदायिक विकास परियोजनाले तीन वटा विद्यालयलाई कम्प्युटर र प्रिन्टर सहयोग गरेको छ ।
मुदीको चन्द्रज्योती मावि खिवाङ, मुनाको धौलागिरि निमावी र मराङको जनविकास निमावीलाई सहयोग गरेको हो । प्रत्येक विद्यालयलाई दुई/दुई वटा कम्प्युटर तथा एक/एक वटा प्रिन्टर सहयोग उपलब्ध गराएको संस्थाले जनाएको छ ।
बेनीमा संस्थाले शुक्रबार आयोजना गरेको कार्यक्रममा विद्यालयका शिक्षक तथा व्यवस्थापन समितिका प्रतिनिधीलाई कम्प्युटर र प्रिन्टर हस्तान्तरण गरिएको थियो । सहयोग हस्तान्तरण गर्दै जिल्ला शिक्षा अधिकारी बिष्णुनारायण श्रेष्ठले सामानको सदुपयोग गर्ने सकेमा विद्यालयको प्रशासनीक कामकाजमा सहज हुनुका साथै शिक्षकहरुको क्षमता बढ्ने बताए ।
मराङ, मुदी, मुना, लुलाङ र गुर्जा गाविसका १९ विद्यालयमा सञ्चालित कार्यक्रम अन्तरगत यसअघि कम्प्युटर नपाएका तथा आवश्यकताको आधारमा यसपाली ३ वटा विद्यालयलाई सहयोग गरिएको परियोजनाका संयोजक जगदिश लोहारले जानकारी दिए । कम्प्युटर र प्रिन्टर उपलब्ध गराउन संस्थाले २ लाख ३९ हजार ८ सय ४२ रुपैया खर्च भएको जनाएको छ ।