मकवानपुर, १३ भदौ । शिक्षक आन्दोलनका कारण बन्द मकवानपुरका संस्थागत विद्यालयहरू खुलाउन सरोकारवालाहरू जिम्मेवार नबन्दा पठनपाठन प्रभावित भएको छ ।
चार दिनदेखि बन्द विद्यालयहरू खुलाउन केन्द्रीयस्तरमा भएको सहमति कार्यान्वयमा शिक्षकहरू असहमत भएपछि विद्यालय सञ्चालन हुन नसकेको हो । विद्यालय सञ्चालकहरूको संस्था प्याब्सन र एनप्याब्सन मकवानपुरले विद्यालय खोल्ने प्रयास गरेको थियो । तर आन्दोलित शिक्षकहरूले केन्द्रीय निर्देशन आफूहरूप्रतिको धोका भएको भन्दै निर्देशनको प्रतिसमेत जलाएका छन् । आफूहरूले जिल्लाको अवस्था हेरेर आन्दोलन सुरु गरेकाले केन्द्रको निर्देशन कुनै हालतमा नमान्ने संयुक्त आन्दोलन संघर्ष समितिका प्रवक्ता सुदीप बर्ताैलाले बताउनुभयो ।
नेपाल संस्थागत विद्यालय शिक्षक युनियन (एनइस्टु) र संस्थागत विद्यालय शिक्षक युनियन (इस्टु)को नेतृत्वमा कर्मचारी र चालक तथा सहचालकहरूसमेत आन्दोलनमा उत्रिएका छन् । जिल्लामा रहेका ७३ निजी बिद्यालय बन्द हुँदा करिब २१ हजार बिद्यार्थी प्रत्यक्ष मारमा परेका छन् ।