काठमाडौं, भदौ १३
उच्च माध्यमिक शिक्षा परिषद्ले लिएको कक्षा १२ र ११ को उत्तरपुस्तिका परीक्षण पारदर्शी नभएको खुलासा भएको छ । उत्तर पुस्तिका परिषद्ले निर्धारण गरेभन्दा बढी संख्यामा शिक्षकले दैनिक रूपमा परीक्षण गरेका कारण परीक्षण पारदर्शी हुन नसकेको हो । परिषद्ले एक दिनमा ५० ओटा मात्र कापी परीक्षण गर्ने मापदण्ड तय गरे पनि शिक्षकहरूले दैनिक ३ सय ओटासम्म परीक्षण गरिरहेका छन् ।
भक्तपुरको कौशलटारमा रहेको जनप्रिय कलेजमा शिक्षा संकायको उत्तरपुस्तिका परीक्षणमा एक शिक्षकले दैनिक २ सयदेखि २ सय ५० सम्म उत्तरपुस्तिका परीक्षण गर्दै आएको पाइएको छ । एउटै शिक्षकले धेरै संख्यामा उत्तरपुस्तिका परीक्षण गरेका कारण परीक्षण भएका अधिकांश उत्तर पुस्तिकामा त्रुटि फेला परेका छन् । परिषद्का परीक्षा नियन्त्रक दुर्गा अर्यालले एकजना शिक्षकले दैनिक ५० भन्दा बढी संख्यामा उत्तरपुस्तिका परीक्षण गर्न नमिल्ने बताए । १२ कक्षाको उत्तरपुस्तिकाको समपरीक्षण गर्ने काम भएको बताउँदै नियन्त्रक अर्यालले भने, ‘उत्तरपुस्तिकामा त्रुटि र लापरबाही फेला परे परीक्षण गर्ने शिक्षकलाई कारबाही गर्ने छौं ।’ उत्तरपुस्तिका परीक्षणमा परिषद्का कर्मचारीले आङ्खm्ना नजिकका व्यक्तिलाई धेरै संख्यामा उत्तरपुस्तिका दिने गरेको आरोप स्रोतको छ ।
स्रोतका अनुसार, १२ कक्षाको उत्तरपुस्तिकामा भएको त्रुटिका कारण समपरीक्षणमा समस्या आएको छ भने ११ कक्षाको उत्तरपुस्तिका अहिले दैनिक रूपमा एक व्यक्तिले नियम भन्दा धेरै संख्यामा परीक्षण गर्दै आएका छन् । कक्षा १२ को विज्ञान संकायको परीक्षाको नतिजा साउनको अन्तिम साता प्रकाशित भए पनि व्यवस्थापन, मानविकी र शिक्षा संकायको परीक्षाको नतिजा प्रकाशित हुन सकेको छैन । परीक्षा नियन्त्रण कार्यालयले भदौको अन्तिम सातासम्म तीनै तहको परीक्षाको नतिजा प्रकाशित गर्ने गरी कामलाई अगाडि बढाएको जनाएको छ । परिषद्ले प्रत्येक उत्तरपुस्तिका परीक्षण गर्दा ५० पूर्णांकका लागि १८ रुपैयाँ र १ सय पूर्णांकका लागि २५ रुपैयाँ दिने गर्दछ ।
परिषद् स्रोतका अनुसार उत्तरपुस्तिका परीक्षणमा लापरबाही गर्ने शिक्षकलाई कालोसूचीमा राखिएको छ । उत्तरपुस्तिका परीक्षण गरेका शिक्षकका अनुसार उत्तरपुस्तिका परीक्षण भएका केन्द्रमा अनुगमन गर्दा परीक्षणमा अनियमितता भएको र प्रभावकारी रूपमा परीक्षण हुन नसकेको पाइन्छ । विद्यार्थीले निकै मेहनतका साथ अध्ययन गरेर दिएको परीक्षाको उत्तरपुस्तिका परीक्षण कार्य प्रभावकारी हुनुपर्नेमा परिषद्ले नतिजा चाँडै प्रकाशित गर्ने भन्दै एक व्यक्तिलाई नियम मिचेर धेरै संख्यामा परीक्षण गर्न दिएको स्रोतले बतायो । त्यस्तै, उच्च माध्यमिक शिक्षा परिषद्को लापरबाहीका कारण हजारौं विद्यार्थी उच्च शिक्षा अध्ययनको समस्यामा परेका छन् । परिषद्ले १२ कक्षाको व्यवस्थापन, मानविकी र शिक्षा संकायको नतिजा समयमा प्रकाशित नगरेका कारण हजारौं विद्यार्थीलाई उच्च शिक्षा अध्ययनमा समस्या परेको हो । परिषद्ले १२ कक्षाको परीक्षा १७ वैशाखमा लिएको थियो । परीक्षा लिएको पाँच महिना बितिसक्दा पनि परीक्षाको नतिजा परिषद्का पदाधिकारी र कर्मचारीबीचको विवादका कारण प्रकाशित हुन नसकेको हो । गत वर्ष २८ साउनमा नतिजा प्रकाशित भएको थियो ।
कक्षा १२ मा नियमिततर्फ २ लाख ४२ हजार ३ सय २४ र आंशिकतर्फ १ लाख ५५ हजार ७ सय ९१ जनाले परीक्षा दिएका थिए । तर, परीक्षाको नतिजाको पर्खाइमा बसेका विद्यार्थी र अभिभावक परिषद्ले समयमा परीक्षाफल प्रकाशित नगरेका कारण उच्च शिक्षा अध्ययनका लागि विदेशमा जान समस्या भएको बताएका छन् । अख्तियार दुरुपयोग अनुसन्धान आयोगले परीक्षा नियन्त्रकबाट अर्याललाई हटाउन निर्देशन दिए पनि परिषद्का अधिकारीले बेवास्ता गर्दै आएका छन् ।
परिषद््का उपाध्यक्ष डा. हेमकुमार मिश्र र सदस्य सचिव भीमलाल गुरुङ अख्तियारको निर्देशनलाई अवज्ञा गरेका कारण अर्याल कायम मुकायम नियन्त्रकको जिम्मेवारीमा छन् । नियन्त्रक अर्यालले नतिजा प्रकाशित गरेपश्चात् नियन्त्रक पद छाड्नुपर्ने चर्को दबाब परेका कारण नतिजा प्रकाशनमा ढिलाइ भएको परिषद् स्रोतले बतायो । नियन्त्रक र परिषद्का उच्च अधिकारीको लापरबाहीका कारण हजारौं विद्यार्थीले समयमा परीक्षाको नजिता नपाएका हुन् ।